Хитойнинг энг йирик амфибия “AG600” самолёти энди серияли ишлаб чиқарилади, деб хабар тарқатди мамлакат авиация саноати корпорацияси.

Баёнотда қайд этилишича, 11 июнь куни ҳаво лайнери ишлаб чиқариш лицензиясини олди ва расмий равишда серияли ишлаб чиқариш босқичига кирди.

“Синьхуа” маълумотига кўра, учоқнинг узунлиги 38,9 метр, баландлиги 11,7 метр, қанотлари кенглиги эса 38,8 метрни ташкил қилади. 

Самолётнинг максимал оғирлиги 60 тонна бўлиб,  4500 километргача учиб бора олади. “AG600” шунингдек, ёнғинларни ўчириш учун 12 тоннагача сув ташишга қодир.

2017 йил декабрь ойида самолёт илк синов парвозини муваффақиятли амалга оширган. Мазкур лойиҳа 2009 йилнинг июнь ойида тасдиқланган ва 2016 йилнинг июль ойида йиғиш ишлари якунланган. 

Таъкидланишича, ҳаво кемаси ёнғин ўчириш ва сувда қутқарув ишларини олиб бориш учун мўлжалланган. Бундан ташқари, у денгиз атроф-муҳит мониторинги, йўловчи ва юк ташиш, фойдали қазилмалар конларини қидириш учун қўшимча ускуналар билан жиҳозланиши мумкин.

С.Раҳимов, ЎзА