Американинг Форд компанияси ва Франциянинг Ренаулт концерни Европа бозорида тобора кучайиб бораётган Хитой электромобилларига қарши туриш учун тарихий ҳамкорликни йўлга қўйди.

CНН хабарига кўра, икки гигантнинг мақсади — арзон, рақобатбардош ва янги авлод электр автомобильларини биргаликда ишлаб чиқариш. 

Ford бош директори Жим Фарлининг айтишича, Европада BYD, XPENG каби Хитой брендлари жуда тез суръатда бозорни эгаллаб бормоқда. У бу бирлашувни ҳатто “ҳаёт учун кураш” деб атаб, компания учун бу ҳамкорлик стратегик аҳамиятга эга эканини таъкидлади. 

Ҳамкорлик доирасида икки хил кичик, бюджет тоифасидаги Ford электромобили ишлаб чиқарилади. Улардан биринчиси 2028 йилда Европа бозорига тақдим этилиши режалаштирилган ва Renaultнинг Франциядаги заводида йиғилади. 

Renault раҳбари Франсуа Провост ҳам Хитой автомобиль ишлаб чиқарувчиларининг жуда тез суръатда устунликка эришаётганини таъкидлади. Унинг сўзларига кўра, энди кутиш эмас, балки тезкор ҳаракат қилиш ва кучларни бирлаштириш даври келган. 

Расмийлар Fort ва Renault орасидаги бу ҳамкорлик тўлиқ қўшилиш эмаслигини, балки фақат стратегик ишлаб чиқариш иттифоқи эканини қайд этди. Ford ушбу ҳамкорлик орқали Европада йўқотиб бораётган бозор улушини тиклашни мақсад қилмоқда — компаниянинг улуши 2019 йилдаги 6,1 фоиздан бугунги кунда 3,3 фоизга тушиб кетган. Renault эса бу орқали ишлаб чиқариш ҳажмини ошириб, харажатларни қисқартиришни мақсад қилмоқда. 

<iframe width="640" height="420" src="https://www.youtube.com/embed/xgyYNPWL_DI" title="Xitoyga qarshi strategik ittifoq" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Мадинабону Насриева, Улуғбек Тўхтаев, ЎзА