Хитойнинг Broad Group компанияси Чанша шаҳрида 28 соату 45 дақиқада қуриб битказилган 10 қаватли бинони жамоатчиликка намойиш қилди. Бинонинг бунёд этилишида инновация технологиялари кенг қўлланилган.

Бинонинг барча қисми олдиндан компания заводида тайёрланган ва юк машиналарида қурилиш майдонига етказилган. Бу ерда ишчилар ва учта кран уйни худди конструкторларга ўхшаб йиғишга киришган, деб хабар қилади Oddity Central нашри.

Уйнинг тайёр модули, болтлар билан маҳкамланган, кейин бино электр ва сув тармоғига уланган.

Broad Group компанияси мутасаддиларининг таъкидлашича, уйни худди автомобилга ўхшатиб йиғиш мумкин. Аввал деталлари тайёрланади, сўнгра барча қисмлари тез фурсатда йиғилади. Уйнинг тайёр модулини қуруқликдан ҳам сув орқали ҳам дунёнинг исталган нуқтасига етказиш мумкин.  

Шу усул билан ҳатто 200 қаватли бинони ҳам йиғиш мумкин, дейди компаниядагилар.

Бундай уйлар неча йил хизмат қилиши мумкинлиги ҳозирча номаълум, бироқ ишлаб чиқарувчининг таъкидлашича, конструкциянинг асоси бўлган зангламайдиган металлар минг йилдан кўп хизмат қилиши мумкин.