Айни кунларда Хитой Тайпей кураш терма жамоаси Ўзбекистонда ўқув-машғулот йиғинларини олиб бормоқда.

Куни кеча спортчилар Тошкент вилоятининг Ангрен шаҳрида жойлашган “Янгиобод” спорт базасида Осиё ўйинларига тайёргарлик кўраётган Ўзбекистон терма жамоаси билан қўшма машғулотда иштирок этди.  

Шунингдек, хорижий меҳмонлар пойтахтимизда жойлашган Халқаро кураш ассоциациясида бўлиб, у ерда бунёд этилган кураш музейи фаолиятини кўздан кечирди. Миллий спортимизга оид экспонатлар билан танишди.  

Мазкур кураш музейи 2012 йилда ташкил этилган бўлиб, миллий спортимизнинг тарихи, бугуни ва ривожланиш динамикасига доир турли тарихий асарларни ўз ичига олган.  

Хитой Тайпей кураш федерацияси мутахассиси Жуан Да Веи кураш спортини оммалаштириш, ўқув-машғулотларни ўтказишдаги ҳамкорлик учун миннатдорлик билдириб, кураш спортининг жозибаси, музей фаолияти ва спортчиларимизнинг техник-тактик машғулотларига юқори баҳо берди.  

Т.Рўзиев,  

ЎзА