Хитой Халқ Республикаси иқтисодий жиҳатдан ривожланган Шандонг провинциясининг Циндао шаҳри марказида жойлашган “SCO International. Trade center” биносида BMB Trade Group компаниясининг ваколатхонаси ўз фаолиятини бошлади.

Бу ўз навбатида, хитойлик ҳамкорларимиз ва тадбиркорлик субъектлари билан янада яқинроқ фаолият олиб бориш учун қулай шарт-шароитлар яратишга хизмат қилади. 

Сўнгги йилларда BMB Trade Group компанияси кўпсонли Шарқ мамлакатлари қаторида жаҳон иқтисодиётида катта улушга эга бўлган Хитой Халқ Республикаси компаниялари билан кўплаб йўналишларда ҳамкорлик қилиб келаётган эди. 

Хусусан, хитойлик ишбилармонлар ҳамкорлигида компания томонидан Ўзбекистонда етиштирилаётган қуруқ мева ва дуккакли маҳсулотлар экспорти ҳамда мамлакатимизга Хитойдан юқори технологиялар асосида яратилган асбоб-ускуналар импорти кенг йўлга қўйилган эди. 

Хитой Халқ Республикасида BMB Trade Group компанияси  ваколатхонасининг иш бошлаши юқорида қайд этилган ва бошқа бир қатор савдо-иқтисодий йўналишлардаги ҳамкорликни янада ривожлантиришга қулай шарт-шароит ва имкониятларни очиб беради. 

Гулноза Бобоева, ЎзА