Хитой электромобилларда электрон бошқарувли эшик тутқичларидан фойдаланишни тақиқлади, деб хабар берди BBC.

Мазкур турдаги тутқичлар илк бор Tesla автомобилларида қўлланилган эди. Дунёдаги назорат органлари электромобилларни синчиклаб текширмоқда. Бунга бир қатор ўлим билан якунланган ҳодисалар, жумладан Хитойда электромобиллар иштирокида содир бўлган икки йўл-транспорт ҳодисаси сабаб бўлган. Ушбу ҳолатларда электр тизимидаги носозлик эшикларни очишга халал бергани тахмин қилинмоқда.

Хитой ОАВларининг ёзишича, янги қоидаларга кўра, автомобиллар эшикларини ичкаридан ҳамда ташқаридан механик усулда очиш имкони мавжуд бўлган тақдирдагина сотувга рухсат этилади.  

Хитой Саноат ва ахборот технологиялари вазирлиги томонидан душанба куни эълон қилинган янги талаблар 2027 йил 1 январдан кучга киради. Янги талаблар фақат Хитойда сотиладиган автомобилларга тааллуқли бўлса-да, таҳлилчилар бу янгилик бутун дунё бўйлаб эшик конструкциясини қайта кўриб чиқишга ундаши мумкин, деб ҳисоблайди. Чунки, Хитой халқаро электромобил бозорида стандартлар белгилаб берувчи давлат сифатида ўз мавқеини тобора мустаҳкамламоқда.

<iframe width="650" height="420" src="https://www.youtube.com/embed/KtTVOwVPjoQ" title="Xitoy elektron eshik tutqichlarini o‘rnatishni taqiqladi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>          

Кенжа Бекжонов, Искандар Исматов, ЎзА