Хитойнинг етакчи робот ишлаб чиқарувчиларидан бири — UBTech Robotics компанияси Хитой–Вьетнам чегара ҳудудларига ўзининг янги авлод одамсимон роботларини жойлаштиришни бошлади.

South China Morning Post нинг ёзишича, компания бу лойиҳа учун 37 миллион долларлик шартнома имзолаган. Роботлар Вьетнам билан чегарадош Гуанси автоном туманидаги Фанчэнган шаҳрида хизмат қилади.   

Лойиҳада UBTechнинг Walker S2  модели қўлланади. Ушбу робот дунёда батареясини мустақил равишда алмаштира оладиган биринчи одамсимон робот сифатида тақдим этилган. Унинг вазифалари кенг: саёҳатчиларга йўл-йўриқ кўрсатиш, кўрикдан ўтказиш, ҳудудни патрульлаш, маълумот йиғиш ва логистика жараёнларида ёрдам бериш.   

Бу ташаббус Хитойнинг робототехника ва сунъий интеллект соҳасидаги кенг кўламли стратегиясининг бир қисми ҳисобланади. Мамлакат сўнгги йилларда ахборот технологияларини амалиётга кенг жорий этиш, давлат секторида меҳнат ресурсларини оптималлаштириш ва такрорланувчи вазифаларни автоматлаштиришга катта эътибор қаратмоқда.   

Масалан, Чжэньцзян провинциясининг иммиграция хизмати аллақачон одамсимон роботлар ҳамда Unitree Robotics компаниясининг тўрт оёқли роботларини иш жараёнларига қўшган. Идора вакилларининг таъкидлашича, ушбу қурилмалар мунтазам ва машаққатли вазифаларни бажариб, ходимлар юкини сезиларли даражада камайтиради.   

Шу билан бирга, Ханчжоудаги Сяошань халқаро аэропортида ҳам роботлар йўловчиларга маълумот бериш, йўл кўрсатиш ва бошқа кундалик хизматларни бажаришда фаол фойдаланилмоқда.   

Хитой мутахассислари фикрича, бундай технологиялар яқин йилларда турли хизмат кўрсатиш соҳаларида одатий ҳолга айланиб, инсон меҳнатини тўлдирувчи муҳим восита сифатида кенг қўлланади.  

<iframe width="640" height="420" src="https://www.youtube.com/embed/4iM0wEdO2Yw" title="Xitoy chegaralariga odamsimon robotlar joylashtirilmoqda" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Мадинабону Насриева, Анвархўжа Аҳмедов (видео), ЎзА