Qarshi shahridagi “Vatanparvarlar” bog‘i Qarshi muhandislik-iqtisodiyot instituti rahbariyati, professor-o‘qituvchilari, tyutorlar va talabalar bilan gavjum bo‘ldi.

“Hisobot konserti” dasturi doirasida tashkil etilgan ushbu ma’naviy-badiiy tadbir avvalida institut rektori Orifjon Bozorov o‘quv yili yakunlari, talabalarning yutuqlari, ta’lim tizimidagi yangilanishlar haqida gapirdi.

Darhaqiqat, 2023-2024 o‘quv yili institut hayotida muhim iz qoldirgan voqealarga, natijalarga va yutuqlarga boy bo‘ldi. 2023 yil davomida professor-o‘qituvchilardan sal kam yetmish nafari doktorlik va falsafa doktori dissertatsiyalarini muvaffaqiyatli himoya qildi. Axborot-resurs markazidagi barcha ilmiy va badiiy adabiyotlar to‘liq raqamlashtirildi. Natijada talabalarning kitoblarni masofadan qabul qilish imkoniyatlari yanada kengaydi.  

– Kuni kecha doktorant Sevara Mirzayorova Zulfiya nomidagi davlat mukofoti sohibasi bo‘ldi, – deydi institutning yoshlar masalalari va ma’naviy-ma’rifiy ishlar bo‘yicha birinchi prorektori Azamat Xayriddinov. – Zavqiddin Boboqulov institut tarixida ilk marta Prezident stipendiyasiga sazovor bo‘lgan talabaga aylandi. Va yana “Zakovat” intellektual olimpiadasida Suhrob Yarashov shashka, Feruza Qurbonova shaxmat bo‘yicha bellashuvlarda oltin medallarni qo‘lga kiritdi. Bularning barchasi yoshlarimizning iqtidorliligi, izlanuvchanligi va professor-o‘qituvchilarimizning mas’uliyati tufaylidir.

Mumtoz navolar zamonaviy kuy-qo‘shilarga ulanib ketdi. Go‘zal raqslar barchaga xushnudlik ulashdi. Alangalangan gulxan yoshlarning qalbidagi otashning hayotdagi ifodasi bo‘ldi.  

– Yaqinda o‘tkazilgan “Mirzo Ulug‘bek vorislari” respublika tanlovi g‘olibi bo‘ldim, – deydi iqtisodiyot fakulteti talabasi Saida Abdunazarova. – Tanlovda “Aqljon” mobil ilovasi bilan ishtirok etdim. Ushbu ilova “Besh muhim tashabbus” doirasida yaratilgan bo‘lib, yoshlarning ma’naviyatini yanada yuksaltirish, ular orasida kitobxonlikni keng targ‘ib etishga yordam beradi.

Muxtasar aytganda, tadbir talabalarning bo‘sh vaqtini mazmunli o‘tkazishga xizmat qilgani bilan ahamiyatli bo‘ldi.  

O‘lmas Barotov, O‘zA muxbiri