Ҳиндистоннинг Одиша штатида учта поезд тўқнашиб кетишига электрон тўсиш тизимидаги носозлик сабаб бўлган, деб баёнот берди мамлакат темир йўллар вазири Ашвини Вайшнав “NDTV” телеканали орқали.

– Электрон блоклаш пайти тизимда ўзгариш содир бўлган, шу боис ҳалокат юз берган – деган у. – Бу воқеа қандай, кимнинг айби билан содир бўлган, текширувдан кейин аниқланади.

Жума куни Ҳиндистоннинг Баласор шаҳри яқинида икки йўловчи ва бир юк поезди тўқнашиб, йирик ҳалокат содир бўлди. Фактлар аниқлаштирилгандан кейин маълум қилинишича, Калькуттадан Ченнайга қараб кетаётган 10-12 вагондан иборат йўловчи поезд ва юк поезди тўқнашиб, издан чиқиб кетган ва ёндош йўлга ағанаган. Бир оз вақт ўтиб, таркибга бошқа йўловчи поезд келиб урилган.

Натижада яна уч-тўрт вагон издан чиқиб, қулаган. Сўнгги маълумотларга кўра, фавқулодда ҳодиса туфайли 288 киши ҳалок бўлган, 900 киши жароҳат олган.