Ҳиндистоннинг Маҳараштра штатида коронавируснинг иккинчи тўлқини тезлик билан тарқалмоқда. Вазият оғирлашиб кетишидан қўрқиб, ҳукумат одамларнинг ҳаракатланишига рухсат бермаяпти.

Маълум бўлишича, Мумбайдан ташқари, деярли, барча ҳудудларда тунги комендантлик соати жорий қилинди.

Кеча Маҳараштрада 7 мингга яқин фуқаро касаллик юқтириб олган, мамлакатнинг айрим жойларида вируснинг янги тури пайдо бўлиши хавфи бор.

Маҳараштра ҳукумати аъзоси С.Д Патил "Биз яна карантин эълон қилишга қодир эмасмиз, одамлар кўрсатмаларга қатъий риоя қилишлари шарт. Aкс ҳолда COVID-19 нинг иккинчи тўлқини кучайиб кетиши мумкин", деди.

Янги қоидаларга биноан, одамлар бугундан бошлаб ижтимоий тадбирларда қатнашиш, саёҳатга чиқишни тўхтатиши керак бўлади.

Соғлиқни сақлаш вазирлиги берган сўнгги маълумотларга кўра, Ҳиндистонда якшанба куни 14 минг 199 киши касалликка учраган, 83 бемор вафот этган.

Таъкидлаш жоиз, коронавирус билан боғлиқ кўрсаткич пандемия бошлангандан буён 11 миллионга етди. Ҳаётдан кўз юмганлар эса 156 минг 385 кишини ташкил этди.

Ҳукуматнинг серологик тадқиқотчиси хасталар қиш охиригача 300 миллион нафарга етиши мумкин, деган тахминларни олға суряпти.

Ўтган йили энг кўп зарар кўрган шаҳарлардан бири - Мумбайда поезд қатнови қайта йўлга қўйилган. Ҳозир транспортдан фойдаланаётган ўн минглаб йўловчи мавжуд. Дарвоқе, йўловчилар учун тиббий ниқобда бўлиш, ҳароратни текширтириб туриш мажбурий. Полиция ниқобсиз юрган одам жаримага тортилишидан огоҳлантирган.