26 iyul kuni AQSHda Hindiston - Tinch okeani iqtisodiy dasturi (IPEF)ga a’zo 14 davlat vakillarining virtual uchrashuvi bo‘lib o‘tadi. Bu haqda “Amerika ovozi” xabar qildi.

Uchrashuvga AQSH Savdo kelishuvi bo‘yicha vakili Ketrin Tay va AQSH Savdo vaziri Jina Raymondo raislik qiladi. Yig‘ilishda savdo, ta’minot zanjiri, “toza” energiya, infratuzilma, shuningdek, soliq va korrupsiyaga qarshi kurashish masalalari muhokama qilinadi. Ushbu dasturga joriy yil may oyida AQSH Prezidenti Jo Baydenning Tokioga tashrifi doirasida asos solingan. Ma’lumotga ko‘ra, Osiyoda ekologik, mehnat va boshqa standartlarni takomillashtirish vositasi bo‘lgan IPEFga AQSHdan tashqari Avstraliya, Bruney, Fiji, Hindiston, Indoneziya, Yaponiya, Janubiy Koreya, Malayziya, Yangi Zelandiya, Filippin, Singapur, Tailand va Vetnam mamlakatlari a’zo.

G. Abdullayeva, O‘zA