«Ипак йўли дурдонаси» XIII халқаро Тошкент кинофестивалига бир қатор ҳинд киноси юлдузлари ҳам ташриф буюради.

Болливуд юлдузлари кинофестиваль доирасида Тошкент, Самарқанд ва Андижон шаҳарларида ўтадиган ҳинд киноси кунларида иштирок этади.

Тошкентга ташриф буюрадиган ҳинд кино юлдузлари орасида машҳур продюсер, режиссёр ва актёр Рича Чадда ҳам бор.  

Рича Чадда 1989 йилда Амритсар шаҳрида туғилган. 2000 йиллардан бошлаб, қатор Болливуд фильмларида роль ижро этишни бошлаган. «Аёл бош вазир» «375-бўлим», «Уч воқеа», «Мен ва Чарлз», «Бўр ва латта», «Бекорчилар», «Маъбудлар билан суҳбат», «Бир ўзинг учавер» сингари фильмларда роль ижро этган.  

Машҳур актёр Навоб Шоҳ ҳам Тошкентга ташриф буюрмоқда.

Навоб Шоҳ 1972 йилда Мумбай шаҳрида туғилган. 1990 йиллардан бошлаб, қатор Болливуд фильмларида роль ижро этишни бошлаган. «Қўрқмас», «Панипат жанги», «Йўлбарс тирик», «Мусофир», «Султон» сингари фильмларда роль ижро этган. Ўзбек томошабинларига «Дон-2» бадиий фильмидаги Абдул Жаббор образи орқали яхши таниш.  

Тошкентга  ҳинд кино юлдузлари орасида машҳур продюсер, режиссёр ва актёр Рандхир Капур ҳам келиши кутилмоқда.

Рандхир Капур 1947 йилда Мумбай шаҳрида, ҳинд киносининг афсонаси Раж Капур хонадонида туғилган. 1970 йиллардан бошлаб, қатор Болливуд фильмларида роль ижро этишни бошлаган. «Икки хўжайин» «Вақт дарёси», «Қийин танлов», «Она», «Супер буви», «Севимли аёлим учун», «Умид», «Уй тўла одам» сингари фильмларда роль ижро этган.  

Тошкентга  машҳур актёр Боман Ирани ҳам келмоқда.

Боман Ирани Капур 1959 йилда Мумбай шаҳрида туғилган. 2000 йиллардан бир қатор Болливуд фильмларида роль ижро этишни бошлаган. «Вир ва Зара», «Уч савдойи», «Олмос ва рақс», «Дон-2», «Дўстлар» сингари ҳинд фильмлари орқали ўзбек кино мухлисларига меҳрини қозонган.  

Ҳинд кино юлдузлари, шунингдек, ўзбек киноижодкорлари иштирокидаги мастер-класс-машғулотлари, ҳинд киноси мухлислари билан учрашувларда ҳам қатнашиши кутилмоқда.

Д. Маматова, ЎзА