Бир парча ерга гул экиб, ундан яхшигина даромад қилса бўлади. Оқолтинлик тадбиркор Ҳимоятхон Эралиева эса бунинг уддасидан чиқди. Бунда яқинлари ва фарзандларининг ёрдами катта бўлди.

У туманнинг Фарғона шаҳарчасига кираверишдаги 15 сотих бўш  турган ерга Наманган шаҳридан 12 минг дона хризантема, яъни халқ тили билан айтганда глобус гулини келтириб экканди. Гулнинг харидоргирлигини айтмайсизми, бир донасини гул шайдолари 20-25  минг сўмдан олиб кетяпти.

–Бу дунёда гулни севмайдиган, унга меҳр қуймайдиган  киши бўлмаса керак. Айниқса, хотин-қизлар. Тошкентга ўтганда ва қайтганда йўл бўйида экилган, хаёлингни олар даражада очилган, бир-биридан чиройли ва анвойи гулларни кўриб, "мен ҳам гулчиликни йўлга қўйсам бўларкан" деган гап сўзлар хаёлимдан ўтганди, –дейди Ҳимоятхон  Эралиева. – Шундан кейин ундан- бундан сўраб гул етиштириш сирларини, интернетда берилган маълумотлардан ўргандим. Озгинагина йиғиб қуйган пулим бор эди. Шунга  хризантема гул кўчатларини  сотиб олдим. Ана шунда  "Гулчилик ҳам касбми,  ундан кўра бошқа фаолият тури билан шуғуллансангиз бўлмайдими" дея айтганлар ҳам бўлди. Аммо мақсадимдан қайтмадим. Кўриб турганингиздек, гул экиб, кам бўлмадим. Келиб -кетувчилар, "гул экманг"  дея айтганлар ҳам мендан  хризантема гулини экиш, уни парваришлаш сир-асрорини ўрганиб кетишяпти.

Ҳимоятхон эккан  нафис ва чиройли бўлиб очилган  хризантема майдончаси гулчилик билан шуғулланиш истагида бўлган оқолтинлик гулсеварлар учун синов-тажриба участкаси  вазифасини ўтяпти. Шу бугунга қадар оқолтинликлар Сайхунобод тажрибасини ўрганиб, ҳовлисидаги бўш турган ер майдонларига   тўқсонбости экинлари қаторига Ҳимоятхон маслаҳати асосида  хризантема ва атиргул  кўчатларини экишяпти.

–Ишсиз ва даромадсиз хотин-қизлар учун Ҳимоятхон бошлаб берган гулчилик йўналиши янгилик бўлди,–дейди "Фарғона"лик Мастура Холматова.– Сўраб-суриштирсак, нафақат  хризантема,балки атиргулларнинг ҳам харидори кўп экан. Фарзандларим билан келишиб, ҳовлимизда бўш турган  8  сотих ер майдонига атиргулнинг бозорбоп навини келтириб экмоқчимиз. Харажати унча катта бўлмаса-да, гул кўчатини сотиб олишимиз учун маблағ кетади. Бунинг учун тижорат банкидан кредит олиб, гулчиликни йўлга қўйишни режалаштирмоқдамиз.  

"Излаган имкон топади" дея  бежизга айтилмаган. Ҳимоятхон Эралиева буни қалбдан тушуниб, гулчиликка қўл уриб, кам бўлгани йўқ. "Биласизми, гулчиликнинг орқасидан ҳам ишли, ҳам даромадли бўлдим. Келгусида бу фаолиятимни янада кенгайтирмоқчиман" дейди у.

Айни вақтда Оқолтинда Ҳимоятхондан бойроқ киши йўқ. 15 сотих ерга экилган ва кўпайтирилган  хризантема гуллари оиласига каттагина даромад келтираяпти. Келгусида у 15 сотих эмас, 1 гектар ерга хризантема ва бошқа гул кўчатларини экиб, Оқолтинда гулчилик ўқув марказига  асос  солмоқчи. Бунинг учун унда етарлича билим, тажриба бор.

–Биласизми, боқимандалик ёмон одат. Ҳаракат қилган одам, кафтдек ердан даромад топиб, рўзғорини бут, дастурхонини тўкин қилса бўлади. Буни нафақат мен, фарзандларим ҳам яхши билгани боис, кафтдек ерга меҳр бериб, қилган меҳнатимиздан барака топмоқдамиз, – дейди у.

Ғулом Примов, ЎзА мухбири