OʼzLiDeP Fargʻona viloyati Kengashi tomonidan Oʻzbekiston Respublikasi Davlat Mustaqilligining 29 yilligiga bagʻishlab “Sen – qudrat manbai, saodat maskani, jonajon Oʻzbekistonim!” shiori ostida turli tadbirlar oʻtkazilmoqda.

OʼzLiDePning navbatdagi tadbiri Fargʻona “Saxovat” keksalar va nogironligi boʻlgan shaxslar uchun internat uyida oʻtkazildi.

– Yurtboshimiz tomonidan ijtimoiy himoyaga muhtoj, nogironligi bor shaxslarning jamiyatdagi oʻrni va mavqeini taʼminlash, salomatliklarini tiklash, moddiy va maʼnaviy koʻmak berish borasida salmoqli ishlar amalga oshirilmoqda, deydi – OʼzLiDeP Fargʻona viloyati Kengashi apparat rahbari Nafisaxon Elchiyeva. – Bugun bu saxovat uyida tashkillashtirilgan tadbirimiz ham yurtimizda olib borilayotgan islohotlarning ijrosidir.

– Ijtimoiy himoyaga muhtoj insonlarni har tomonlama qoʻllab-quvvatlash borasida katta ishlar amalga oshirilmoqda. Xususan, yaqinda Prezidentimiz tomonidan 14 mlrd. soʻm pul mablagʻi ajratilib, binolarimiz qayta rekonstruksiya qilindi. Bu maskanda barcha shart-sharoitlar yaratilgan. Hattoki, bu yerda istiqomat qiluvchi fuqarolarning istaklari bilan taomnomalar tuziladi, ular aytgan taomlar tayyorlanadi, – deydi Fargʻona “Saxovat” keksalar va nogironligi boʻlgan shaxslar uchun internat uyi direktori Nigoraxon Asqarova.

Istiqlol ayyomi oldidan tashkillangan saxovat tadbirida partiya masʼullari bu yerda yashovchilar bilan suhbatlashar ekanlar, nuroniylar yuz-koʻzida shukronalik zohir. Ular oʻzlariga koʻrsatilayotgan yuksak eʼtiboru eʼzozdan mamnunlar.

Tashrif doirasida internat uyiga OʼzLiDePdan saylangan Fargʻona viloyati Kengashi deputati Asqar Qodirov tomonidan esdalik sovgʻalari topshirildi.