2021 йил 15 март куни Республика хотин-қизлар жамоатчилик кенгашининг биринчи йиғилиши бўлиб ўтди.

Мазкур тузилманинг мақсад-муддаоси, вазифалари нималардан иборат экани йиғилишда атрофлича муҳокама этилди.

Йиғилишда сенаторлар, Кенгаш аъзолари, вазирлик ва идораларнинг мутасаддилари, оммавий ахборот воситалари вакиллари иштирок этди.

Ўзбекистон Республикаси Олий Мажлиси Сенати Раиси, Республика хотин-қизлар жамоатчилик кенгаши раиси Танзила Норбоева олиб борган ушбу йиғилишда мамлакатимизда аёллар манфаатларини таъминлаш, ёрдамга муҳтож аёлларни кучли ижтимоий ҳимоялаш, қийналган опа-сингилларга амалий кўмак кўрсатиш масаласи шиддат билан кечаётган ислоҳотларда устувор ўрин эгаллаётгани таъкидланди.

Президентимиз Шавкат Мирзиёев Олий Мажлисга йўллаган Мурожаатномасида Республика хотин-қизлар жамоатчилик кенгаши тузилиши, унга Сенат Раиси раҳбарлик қилишини таъкидлаган эди.

Шу билан бирга, 2021 йил 5 март куни давлатимиз раҳбарининг «Хотин-қизларни қўллаб-қувватлаш, уларнинг жамият ҳаётидаги фаол иштирокини таъминлаш тизимини янада такомиллаштириш чора-тадбирлари тўғрисида»ги қарори қабул қилинди. Мазкур ҳужжатга мувофиқ, Республика хотин-қизлар жамоатчилик кенгашининг асосий вазифалари белгиланди.

Йиғилишда ташкилий масалалар кўриб чиқилди. Хусусан, Республика хотин-қизлар жамоатчилик кенгаши тўғрисидаги низом тасдиқланди. Шу билан бирга, Кенгаш олдидаги вазифалар, жумладан, жойларда мавжуд муаммолар аниқланиб, уларни бартараф этишга оид ишларни амалга ошириш, аёллар бандлигини таъминлаш, аёлларни ҳунармандлик ва тадбиркорликка жалб этиш каби кўплаб масалалар атрофлича муҳокама этилди.

Қолаверса, Республика хотин-қизлар жамоатчилик кенгашининг 2021 йилга мўлжалланган иш режаси лойиҳаси кўриб чиқилди. Жумладан, нотурар жойларда истиқомат қилаётган аёллар, отасидан айрилган, ёлғиз онаси қарамоғида бўлган вояга етган қизлар, даволанишга муҳтож хотин-қизлар рўйхатини шакллантириш зарурлиги қайд этилди.

Шунингдек, йил давомида ҳар бир ҳудудда асосан хотин-қизлар фаолият юритадиган ҳунармандчилик турларига ихтисослашган кластерлар фаолияти тажриба сифатида жорий этилиши мақсадга мувофиқлиги таъкидланди.

Ишсиз фуқароларга тизимли ёрдам кўрсатиш ҳамда «маҳаллабай» асосда ишларни ташкил этиш мақсадида ҳар бир маҳаллада меҳнат инспекторига «жамоатчи ёрдамчи» жалб этиш вазифаси белгилаб берилди.

Бундан ташқари, янги рўйхатдан ўтган Тадбиркор хотин-қизларга бўш турган биноларни имтиёзли асосда 1 йилгача бўлган муддатга ижарага бериб, ижара ҳақининг 3 ой мобайнида 2,5 миллион сўмгача бўлган қисмини Бандликка кўмаклашиш жамғармаси маблағлари ҳисобидан бериш механизми жорий этилади.

Шунингдек, тадбирда жазони ижро этиш муассасаларида жазо муддатини ўтаётган хотин-қизларни касб-ҳунарга ўқитиш, уларнинг психологик-ҳуқуқий онги ва маданиятини ошириш бўйича тизимли ишларни йўлга қўйиш, озодликка чиқарилган хотин-қизларнинг бандлигини таъминлашга нодавлат нотижорат ташкилотларини жалб этиш, шу мақсадда улар ўртасида грантлар эълон қилиш ҳам белгилаб олинди.

Йиғилишда эрта никоҳ, эрта туғруқ, оилалардаги зўравонлик, ажримлар, уларни келтириб чиқарувчи сабабларни аниқлаш масалалари кўриб чиқилиб, бу борада Маҳалла ва оила илмий-тадқиқот институти доимий равишда тадқиқотлар ўтказилиши белгиланди.

Ишчан ва амалий руҳда ўтказилган йиғилишда мазкур йўналишда амалга оширилиши зарур бўлган ишлар юзасидан таклиф ва тавсиялар билдирилди.

 Назокат Усмонова, ЎзА