“Air India” ҳалокатидан қутулиб қолган ягона йўловчи ҳаётидаги оғриқли дамларни гапириб берди.

Лондон йўналишидаги рейс ҳалокатга учраганда дунё аҳли ғамга ботди: 241 одам ҳаётдан кўз юмди. Ўшанда мўъжиза юз бериб, ёниб кетган лайнер ичидан, жонсиз жасадлар орасидан ягона йўловчи, Висвашкумар Рамеш тирик чиқди. Бугун у ўзини бир вақтнинг ўзида “энг омадли ва энг оғир азобга дучор инсон” дея таърифламоқда.

Фожиадан кейин бу йигитнинг ҳаёти тубдан ўзгарди. Самолётда бир неча ўриндиқ нарида ўтирган укаси ҳам қаро ер қаърига кетди.

– Одамлар мени омадли дейишади, лекин йўқотганларимни ҳеч ким ҳис қилмайди, – дейди у.

Омон қолган тана – cинган руҳ

Рамеш уйига қайтгач, ташқи дунёдан узилди, хонасида ёлғиз ўтиришга одатланди. Ҳатто рафиқаси ва 4 ёшли ўғли билан гаплашишга ҳам куч тополмаяпти. Ўзининг сўзларига кўра, энг яқин одамидан айирган фожиа ва ёнаётган учоқдан тирик чиқиш тасаввури уни ич-ичидан емирмоқда. Ҳалокатдан кейинги руҳий жароҳат, зўриқиш билан курашмоқда. Бинобарин, шу пайтгача тиббий ёрдам ҳам, руҳий қўллаб-қувватлов ҳам олмаган.

– У ҳалокатдан тирик чиққани билан, бутунлай бошқа одамга айланган, – дейди маҳаллий ҳамжамият вакиллари.

Оловдан — ёлғизликка

Фожиа чоғи Рамеш хавфсизлик камарини ечиб, самолётдан ёнаётган танаси билан судралиб чиққан. Ўша онларда муҳрланган сурат, видео лавҳаларда у деярли шикастланмагандек кўринади. Ҳозир эса оёғи, елкаси, тиззаси ва белида доимий оғриқ бор. Юролмайди, машинани бошқаролмайди, ишлай олмайди. Укаси билан бирга юритган оилавий бизнеси ҳам тўхтаган.

Мўъжиза ортидаги фожеа

Двигателига ёнилғи келиши узилган самолёт ҳавога кўтарилганидан бир неча сония ўтиб, қулаган. Бундай ҳолатда қутулиш — мўъжиза, аммо қаҳрамон ўзи айтганидек, “мўъжиза ҳам баъзан лаънат”дек туюлади.

Ҳозир Висвашкумарнинг орзуси шу: тинчлик ва одамлар унинг азобини тушуниши.

Мусулмон Зиё, ЎзА