Хави ресми түрде «Барселонаның» бас бапкері ретінде жұмысын жалғастыруға шешім қабылдағанын хабарлады.

Клуб президенті Джоан Лапорта мен Хавидің қатысуымен өткен баспасөз мәслихатында испандық бапкер оның командада қалуына не түрткі болғанын айтты.

«Клубта бастаған жобамыз жалғасын табады. Бұл клуб үшін де жақсы шешім деп ойлаймын. Мен «Барсаның» үлкен жанкүйерімін. Мен басшылық пен директорлар кеңесінің клубқа деген жоғары сенімін сезіндім. Ойыншылардың қолдауы да маңызды рөл атқарды. Сондай-ақ жанкүйерлерге сенімдері мен сүйіспеншілігі үшін алғыс айтамын.

Бұл клуб үшін қолымнан келгеннің бәрін жасауға дайын екенімді бәрі біледі. Мен өз ойымды клуб президентімен сұхбатта айттым», деген Хави.

Еске сала кетейік, Хави 28 қаңтарда «Вильярреалдан» жеңілгеннен кейін (3:5) маусым соңында командадан кететінін мәлімдеген болатын. Осыдан кейін бапкер пікірін өзгертпейтінін бірнеше рет қайталап айтқан еді.