Тошкент вилояти маҳалла тизимида самарали меҳнат қилаётган, соҳа ривожига муносиб ҳисса қўшаётган, юрт тараққиёти йўлида жонкуярлик кўрсатаётган 53 нафар фидойи юртдошимизга “Маҳалла ифтихори” кўкрак нишонлари тантанали равишда топширилган эди.

Президентининг 2017 йил 13 июлдаги “Маҳалла ифтихори” кўкрак нишонини таъсис этиш тўғрисида”ги қарорига мувофиқ ташаббускор фуқаролар ва жамоатчилик тузилмалари вакиллари тақдирланади.

Ана шундай фаоллар орасида Ўрта Чирчиқ туманидаги “Достонбек Азизбек Агро” фермер хўжалиги раҳбари, “Томорқа хизмати” МЧЖ директори бўлиб ишлаб келаётган Комила опа Жуманазарова ҳам бор.

– 27 йиллик иш тажрибасига эгаман, – дейди К. Жуманазарова. – 2021 йил мен учун жуда баракали йил бўлди, десам адашмайман. 7 март  куни “Мўътабар аёл” кўкрак нишони, 24 март куни “Маҳалла ифтихорим” кўкрак нишонлари билан тақдирландим. Бу рағбат, эътибор ва эъзоздан жуда хурсанд бўлдим. Аслида меҳнатларимни қадрлаб эътироф этганларининг ўзи катта эътироф. Маҳалланинг қадр-қиммати юксалиб, меҳнатлари кўзга кўриниб, мақталаётганини кўриб яшаш қанчалик шараф эканини сўз билан ифода этиш қийин, буни ҳис қилиш керак. Бу ўз олдимга улкан режалар қўйишга ундади. Ўзим яшаб турган жойда –Абдулла Қаҳҳор кўчасини обод қилиш ишларини бошлаб юбордим. Кўча симёғочларига ёритгичлар ўрнатиш ишлари бораяпти. Кўча юзида ахлатхона бор, шу ерни туман ҳокимлиги билан маслаҳатлашиб обод қилиб, болалар учун ўйингоҳ ташкил этишни режалаштирганмиз.

Кўчага арча, гуллар экиб, намунали кўча қилиб бермоқчимиз. Бу ишимиз бизга яратиб берилаётган имкониятлар, аёлларга кўрсатилаётган ҳурмат-эътибор олдида денгиздан бир томчи холос. Юртимизда қанча тадбиркорлар, фермер дехқонлар бор, бу дегани бизда қолоқ маҳаллалар бўлмайди. Инсон ҳаётда ўзидан амаллар, эзгу ишлар қолдириб ёниб яшаши керак.

ЎзА мухбири

А.Мусаев ёзиб олди.