Toshkentda qit’aning 15 ga yaqin davlatidan ketgan delegatlar ishtirokida Osiyo qo‘l jangi federatsiyasining kongressi bo‘lib o‘tdi.

Unda ishtirok etgan O‘zbekiston sport vaziri o‘rinbosari Sh.Mahmudov, Milliy olimpiya qo‘mitasi bosh kotibi O.Qosimov, Xalqaro qo‘l jangi federatsiyasi raisi S.Astaxov va O‘zbekiston qo‘l jangi federatsiyasi raisi R.Jo‘rayev yurtimizga kelgan mehmonlarni qutladi. Ushbu sport turining xalqaro maydonda keng ommalashayotgani, bir qator kompleks o‘yinlar dasturidan joy olgani, 2025-yili poytaxtimizda o‘smirlar o‘rtasida o‘tadigan Osiyo o‘yinlari dasturiga kiritilgani e’tirof etildi.

Yig‘ilishda shuningdek, qo‘l jangi sport turini qit’ada rivojlantirish masalalari, Osiyo qit’asi davlatlaridagi Milliy olimpiya qo‘mitalari bilan hamkorlikni kengaytirish, Osiyo olimpiya kengashi, Xalqaro olimpiya qo‘mitasi kabi tashkilotlar bilan hamkorlikda qo‘l jangi sport turini ommalashtirish bo‘yicha aloqalarni mustahkamlash muhimligi ta’kidlanib, murabbiy va mutaxassislarni tayyorlash borasida olib borilayotgan ishlar tahlil qilindi.

Kongressda Osiyo qo‘l jangi federatsiyasining o‘tgan yilgi faoliyati yakunlari bo‘yicha xulosalar qilinib, kelgusi to‘rt yillikning muhim masalalari bo‘yicha qarorlar qabul qilindi.

Delegatlarning ovoz berishi natijasida hamyurtimiz Baxtiyor Mirzaqulov Osiyo qo‘l jangi federatsiyasi prezidentligiga saylandi.

T. Ro‘ziyev, O‘zA