Андижон аҳолиси зичлиги билан ҳатто Япониядан ҳам илгарилаб кетган. Бу ҳудуднинг асосий муаммоси – иш ўрни. Шундан Ўзбекистон Президенти Шавкат Мирзиёев Андижондаги минглаб ёшлар меҳнат қилаётган “Асака текстиль” кластерининг тўқимачилик корхонасига борди.

Бу улкан мажмуа иқтисодий бирликнинг ёрқин мисоли. 2016 йилгача бу ер ташландиқ жой эди. Давлатимиз раҳбари тадбиркорларга берган руҳ ва мадад натижасида 13 гектар майдонга босқичма-босқич янги бинолар қурилиб, 2022 йил август ойида ишга туширилди. Бугунги кунда 83 миллион долларлик лойиҳа эвазига хомашёдан тайёр маҳсулотгача бўлган тўлиқ “занжир” ташкил этилган. 

Асакадаги корхонага Швейцария, Италия, Туркия, Германия, Япониядан ускуналар келтириб ўрнатилган. У йилига 11 минг тонна ип-калава, 8 минг тонна момиқ ва трикотаж мато, 12 минг тонна ип ва матони бўяш, 6 минг тонна тайёр трикотаж ва сочиқ ишлаб чиқариш қувватига эга. Бу ерда 3 минг 200 киши ишламоқда. 

Корхонада хорижий ҳамкорлар талабига асосан сифат назорати, касб ўргатиш маркази ташкил этилган. Бўёқ цехидан чиққан сувни тозалаш иншооти ҳам ишга туширилган. 

<iframe width="650" height="420" src="https://www.youtube.com/embed/bEF0ALSyZwo" title="Hamdambek Abdullayev: Prezidentimiz bilan uchrashuvdan kuch va ilhom oldik" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" allowfullscreen></iframe>

Умуман, кластер томонидан 102 миллион долларлик лойиҳалар амалга оширилиб, йиллик 50 миллион долларлик экспорт қуввати яратилган. 
Кластер чигит экишдан тайёр маҳсулотни сотишгача бўлган жараённи йўлга қўйиб, ўзига хос тажриба мактабига асос солди. Ҳолбуки, улар Асакада эмас, чет туманларда деҳқончилик қиладилар. 

–Ерларимиз Хоразмнинг Янгибозор, Андижон вилоятининг Улуғнор ва Жалақудуқ туманларида бўлиб, жами 11 гектарни ташкил қилади. Пахтадан ўртача ҳосилдорлик 45 центнерга етди, – дейди “Асака текстиль” тўқимачилик корхонаси ижрочи директори Ҳамдамбек Абдуллаев. 

Яна бир жиҳатни алоҳида таъкидлаш лозим. Корхонада ишлаётган аёлларнинг бир қисми Асакада юқори маошли иш ўрни пайдо бўлгани учун меҳнат муҳожирлигидан қайтиб келган. Яқин вақт ичида уларнинг сони яна ошади. 

–Муҳтарам Президентимиз билан учрашганимиздан сўнг янги лойиҳаларни амалга оширишни режа қилдик, – дейди Ҳамдамбек Абдуллаев. – Масалан, Улуғнор туманида мато тўқиш, тикув ва пайпоқ тўқув цехларини қурамиз. Умумий мақсадимиз ўн минг нафар ёшлар, хотин-қизларни иш билан таъминлаш. 

Ўзбекистон пахта толаси экспорт қилувчи давлат эди. Ким ўйлабди, қисқа вақт ичида энди ўзи пахта хом-ашёсини импорт қилувчига айланади, деб. Дарвоқе, энди экспортга тайёр маҳсулот – пахтадан ишлаб чиқарилган турфа хил кийим бош жўнатилмоқда. “Асака текстиль” ана шундай йирик экспортёрлар сафида. 

Муҳаммаджон Обидов, Элёр Олимов (видео), ЎзА