ХАМАС 20 май куни эрталаб Исроил билан ўт очишни тўхтатишга келишиб олгани ҳақида тарқалган хабарларни рад этди. Ҳаракатнинг сиёсий бюроси аъзоси Иззат ар-Решек шу ҳақда маълум қилган.

Бундан аввалроқ Миср Исроил телеканалида тарқатилган хабарга таяниб, пайшанба куни эрталаб соат 6:00 дан можаро кетаётган ҳудудда ўт очишни тўхтатиш режимини жорий этиш таклифини илгари сурган эди. Ўшанда ХАМАС ушбу таклифга рози бўлгани ҳақда хабар тарқатилганди.

"ХАМАС пайшанба куни ўт очишни тўхтатиш шартига  рози бўлди, деб тарқатилган хабар ҳақиқат эмас. Ҳеч қандай келишув ёки ўт очишни тўхтатиш бўйича аниқ муддат белгиланишига эришилмаган", — деб ёзди ар-Решек ижтимоий тармоқ орқали тарқатган хабарида.

Ушбу хабарга ҳозирча Исроил томони изоҳ бермаяпти.  

Сўнгги хабарларга кўра, мазкур можарода Исроилнинг 12 фуқароси ҳалок бўлган, 50 дан зиёд киши жиддий жароҳат олган. Тель-Авив амалга оширган авиазарбалар натижасида эма Фаластин томонидан 213 киши қурбон бўлди.