15 мартдан 15 майгача Маданият ва санъатни ривожлантириш жамғармаси томонидан "Халқаро театр ва балет фестивали-2022" ташкил этилади. Унда Москванинг «Современник» театри, «Замонавий пьеса мактаби», «Театр наций», А.П. Чехов номидаги Москва бадиий театри, Борис Эйфман номидаги Санкт-Петербург давлат академик балет театри, Алишер Навоий номидаги Ўзбекистон давлат академик катта театри, Марк Вайлнинг «Илҳом» театри, Ўзбекистон Ёшлар театри иштирок этади.

Пойтахт аҳолиси ва меҳмонлари хориж санъатнинг ажойиб намуналарини томоша қилишлари мумкин. Уларни қуйидаги спектакллар кутмоқда:

15-16 март.

«Лазги — қалб ва муҳаббат рақси».

2021 йил сентябрь ойида Ўзбекистонда ЮНЕСКО ҳомийлиги остида катта премьера бўлиб ўтди ва бу профессионал ҳамжамият ҳамда томошабинлар томонидан юқори баҳоланди. 2021 йил ноябрь ойида эса Дубайдаги EXPO-2020 кўргазмасида Ўзбекистоннинг маданий дастури доирасида Dubai Opera’ саҳнасида балет спектаклининг жаҳон премьераси бўлиб ўтди. Бу халқаро жамоатчилик ва оммавий ахборот воситаларида катта қизиқиш уйғотди.

19-20 март.

Сергей Полуниннинг «Satori» шоу-балети премьераси.

«Satori» томошаси — рақсдаги модернизм. Ҳаёт йўли ва шахсий ривожланиш ҳақидаги спектаклни яратиш ғояси Дю Солей циркининг директори – Габриел Марсел дел Веккиога тегишли. Satori премьераси 2017 йилнинг декабрь ойида Лондон Колизейида бўлиб ўтди. Саҳна асари томошабинлар ва танқидчиларнинг олқишларига сабаб бўлди.

1 апрель. 

«Тонг. Оқшом» спектакли.

Спектакль 2019 йилнинг охирида мустақил лойиҳа сифатида яратилган. Россия ва хориждаги бир қанча театрларида намойиш этилган. 2021 йилдан у «Современник» театри репертуарига кирди. Спектаклда Бах, Гендель, Филипп Гласс ва Арво Пяр мусиқий асарлари янграйди.

2 апрель.

«Дада» спектакли.

«Дада» — атипик француз пьесаси. Муаллиф унинг жанрини "фожиали фарс" деб белгилаган. 2014 йилда француз ёзувчиси ва драматурги Флориан Зеллер «Дада» спектакли учун Франциянинг бош театр мукофоти - Мольер мукофоти билан тақдирланган. Ушбу пьеса асосидаги спектакллар Париж, Лондон, Нью-Йорк, Сидней, Гонконг ва бошқа кўплаб шаҳарларда катта муваффақият билан ўтказилди.

3 апрель.

«Ўғил» спектакли.

Зеллер талқинига кўра, оталар ва ўғиллар муаммоси – детектив асар бўлиб, биз потенциал айбдорларни излаш билан банд бўламиз. Бироқ, ҳар бир гумондор шахснинг жиноятга дахлсизлиги мавжуд. Ҳикоянинг “содда” туюлган сюжети ортида ҳақиқий фожиа ётибди. Бу эса “ҳаёт ёки мамот?” деган азалий саволни яна бир бор кўтаради.

4 апрель.

«Дели рақси» спектакли.

Драматург, актёр, режиссёр, сценарийнавис Иван Вирипаевнинг "Дели рақси" пьесаси асосидаги пластик спектакль. У севги, ўлим, азоб-уқубатлар, узр ва уни қабул қилиш ҳақида. Асар биринчи марта 2012 йилда Рим кинофестивалида "Cinema XXI" асосий танлови доирасида тақдим этилган.

7 апрель.

«Венецияликларнинг юксак суви» спектакли.

Спектакль Бах, Лист ва Шостакович мусиқалари жўрлигида муҳаббат, ҳаёт учун кураш, хотира ва буюк Венецияга бағишланади. Асар биринчи марта 2019 йилда Эрмитаж саҳнасида намойиш этилган.

9 апрель.

«Гамлет» спектакли.

Бу канадалик юқори технологияли театр устаси Роберт Лепагенинг Россиядаги биринчи спектакли. Шекспир фожиасининг барча асосий ролларини дастурлаштирилган кубда - учта девор экранининг секин айланадиган бурчагида махсус тарзда жойлаштирилган Евгений Миронов ижро этади.

16 апрель.

«Шимол шамоли» спектакли.

Машҳур актриса Рената Литвинова ушбу лойиҳада бир вақтнинг ўзида спектакль муаллифи, режиссёр ва бош роль ижрочиси сифатида иштирок этади. Асарда театр ва кинонинг таниқли актёрлари иштирок этади. Бу жанр муаллиф томонидан “ҳақиқий фантасмагория” деб таърифланган.

2 май.

«Бир кунлик хоним» спектакли.

Ушбу спектаклни томоша қилишда томошабинлар Америка шаҳри ҳаётидаги тентакона бир куннинг гувоҳи бўлишади. Бу оптимизм, ҳазил ва мўжизалар кутиш билан тўлган кун. Оддий ва қувноқ спектакл энг муҳим нарса - тақдирнинг тўқнашувлари устидан яхшиликнинг ғалабаси, ҳақиқий дўстлик ва севгининг буюк кучи ҳақида гапиради.

3 май.

«Метаморфоза» спектакли.

Кафканинг «Метаморфоза» қиссаси асосида саҳналаштирилган спектакль инсонпарварлик, қариндош-уруғлар ўртасидаги муносабатлар, ёлғон ва хасислик ҳақидадир. Франц Кафка оилавий муносабатлар муаммоларига тўхталиб, моддий қийинчиликлар туфайли одам инсонийликни бутунлай йўқотиши мумкинлигини кўрсатди.

12-13 май.

«Анна Каренина» балети.

Спектакль ички психологик энергия билан тўла ва унинг ҳиссий таъсирини ҳайратланарли даражада аниқ очиб берган. Лев Толстой романининг барча иккинчи даражали сюжетларини олиб ташлаган хореограф муҳаббат учбурчагига эътибор қаратди: Анна - Каренин - Вронский. Спектакль биринчи марта 2005 йилда намойиш этилган.

14-15 май.

«Роден, унинг абадий маъбуди».

Асар буюк ҳайкалтарошлар Август Роден ва унинг шогирди, севгилиси ва илҳом париси Камилла Клоделнинг тақдири ва ижодига бағишланган. "Роден, унинг абадий маъбуди" - даҳоларнинг ҳаёт йўли фожиаси мавзусидаги кенг кўламли ижодий баёнот. Спектакль илк бора 2011 йилда намойиш этилган.

Назокат УСМОНОВА, ЎзА