Ўзбекистон Республикаси тарихида биринчи марта “Навоий кон-металлургия комбинати” АЖ томонидан етакчи халқаро банклардан 5 йил муддатга гаровсиз узоқ муддатли синдикациялашган кредит жалб этилди.

Корхона матбуот хизматининг хабар беришича, битимнинг умумий қиймати 1,2 миллиард АҚШ долларини ташкил этади. Маблағларни тақдим этишда JP Morgan&Chase, Citi, Societe Generale, Credit Suisse, ICBC Standard, Halyk Bank va Deutsche Bank каби банклар иштирок этмоқда. Маблағлар компаниянинг умумий корпоратив мақсадлари ҳамда инвестиция дастурини молиялаштириш учун йўналтирилади.

Бу “Навоий кон-металлургия комбинати” АЖ учун халқаро молия бозорлари билан ҳамкорликни ривожлантириш бўйича биринчи қадам бўлиб, компанияни келажакда евробонд жойлаштириш ва акцияларни бирламчи оммавий таклиф (IPO) га тайёрлайди.

- 2019 йилда бошланган “НКМК” АЖнинг трансформацияси компаниянинг Ўзбекистон Республикаси олтин қазиб олиш саноатидаги мавқеини сезиларли даражада мустаҳкамлади. АЖни трансформация қилиш ва олтин ишлаб чиқариш бўйича глобал етакчига айлантиришнинг яна бир босқичи сифатида биз бу борадаги барча жараёнларни Жаҳон олтин кенгаши (World Gold Council) ва Sianidни бошқариш бўйича халқаро Kodeks (International Cyanide Management Code) томонидан ишлаб чиқилган масъулиятли олтин қазиб олиш (Responsible Gold Mining Principles) тамойиллари билан бирлаштиришга қаратилган мақсадимизни эълон қиламиз, - дейди “НКМК” АЖнинг Жамоатчилик билан алоқалар бўйича директори Холмамат Раупов.

А.Бўриев, ЎзА