Жанубий Корея собиқ президенти Юн Сок Ёль Шимолий Кореяга дронлар юборгани учун унга “душманга ёрдам берганлик” айблови қўйилди. Бу ҳақда тергов гуруҳига таяниб, Yonhap хабар берди. Собиқ президент ҳокимият ваколатини суиистеъмол қилганликда ҳам айбланмоқда. Махсус тергов гуруҳи маълумотларига кўра, Юн 2024 йил октябрь ойида Пхеньяннинг жавоб ҳаракатларини қўзғатиш ва ўша йилнинг декабрь ойида ҳарбий ҳолат жорий этиш учун баҳона сифатида Шимолий Кореяга дронларни юборишни буюрган.

Британия телерадиокорпорацияси (BBC) бош директори Тим Дейви ва BBC News янгиликлар бўлими раҳбари Дебора Тернесс истеъфога чиқди. Бунга АҚШ президенти Дональд Трампнинг нутқи сохталаштирилган ҳолда эфирга узатилгани бўйича можаро сабаб бўлди. Гап 2024 йилги АҚШ президенти сайловларидан бир ҳафта олдин BBC томонидан намойиш этилган Панорама дастурининг “Трамп: иккинчи имконият?” номли эпизоди ҳақида кетмоқда. Видеода Трампнинг 2021 йил 6 январда сўзлаган нутқидан парчалар шундай монтаж қилинганки, гўё АҚШ президенти ўз тарафдорларига улар билан бирга Капитолийга боришини ва “шер каби жанг қилишини” айтади. Аслида Трамп бир оз бошқа нарса ҳақида гапирмоқда.

АҚШ президенти Дональд Трамп божхона тўловларидан олинган даромаддан ҳар бир фуқарога камида 2 минг доллар (1729 евро) “дивиденд” тўланишини айтди. У бу ҳақда ўзининг Truth Social ижтимоий тармоғида маълум қилди. ​Америка етакчиси бир неча ой олдин фуқароларга пул тарқатиш ғоясини оммага эълон қилган. Бироқ буни амалга ошириш бўйича аниқ қадамларни белгиламаган.

Буюк Британия ҳукумати мамлакат бўйлаб ҳаракатланаётган юзлаб Хитой электр автобусларини текширувдан ўтказади. Бу ҳақда ҳукумат доираларидаги манбаларга таяниб, Financial Times (ФТ) хабар берди. Текширувга Норвегия томонидан олиб борилган тадқиқот сабаб бўлди. Унда Yutong компанияси ўз автобусларини масофадан туриб ўчириши ёки ишдан чиқариши мумкинлиги аниқланди. Ҳозирги вақтда Буюк Британияда 700 га яқин Yutong автобуслари бор, улар асосан Ноттингем, Жанубий Уэлс ва Глазгода ҳаракатланади.

Эрон ҳукумати сув танқислиги кучайгани сабаб Теҳронда тунда сув таъминотини узиб қўйишни бошлайди. Бу ҳақда Энергетика вазирлигига таяниб, Euronews хабар берди. Президент Масъуд Пезешкиённинг сўзларига кўра, пойтахтни сув билан таъминлайдиган сув омборлари сўнгги 60 йилдаги энг паст даражага тушган. Айримларида эса 10 фоиздан ҳам кам сув қолган. Тўққиз миллиондан ортиқ аҳолиси бор Теҳрон олти йил кетма-кет давом этаётган қурғоқчилик билан курашмоқда. Бу ҳолат нафақат ичимлик сувини, балки ГЭСларда электр ишлаб чиқаришни ҳам хавф остига қўймоқда.

<iframe width="560" height="315" src="https://www.youtube.com/embed/ciOmFELT4D8?si=DJq4XufOsFjYQVju" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Ирода Жўраева, Улуғбек Тўхтаев, ЎзА