Жаҳон соғлиқни сақлаш ташкилоти (ЖССТ) болалар ўлимига сабаб бўлган ва Ҳиндистонда ишлаб чиқарилган учта йўтал сиропидан огоҳлантирди. ЖССТ баёнотига кўра, бу дорилар Cоldrif, Respifresh TR ва ReLife номли сиропларнинг айрим партиялари ҳисобланади.

Уларни Sresan Pharmaceutical, Rednex Pharmaceuticals ва Shape Pharma номли ҳинд компаниялари ишлаб чиқарган. Мазкур суюқ дорилар таркибида  диэтилен гликоль деб аталувчи заҳарли модданинг миқдори меъёрдан юқори. Бу эса болалар саломатлигига жиддий таҳдид солади, ҳаттоки ўлимга олиб келади. Ҳиндистонда сўнгги кунларда камида 20 нафар бола айнан шу сиропларни қабул қилиши ортидан вафот этди. Бундан ташқари, 11 нафар боланинг аҳволи жуда оғир.

Россия президенти Владимир Путин 2026–2030 йилларга мўлжалланган давлат миграция сиёсатининг янги концепциясини тасдиқлади. Ҳужжат расмий ҳуқуқий ҳужжатлар порталида эълон қилинди. У 2018 йилдан бери амал қилиб келаётган ҳозирги сиёсатнинг ўрнини эгаллайди. Унга кўра, Россияга ишлаш учун келаётган муҳожирлар сонининг ўсиши 2030 йилгача сақланиб қолади. Бу чет эллик ишчиларга бўлган эҳтиёж билан боғлиқ. Янги концепцияда миграция сиёсатининг мақсади, вазифалари ва йўналишлари белгиланган. Ҳужжатда чет эл фуқароларининг кириш-чиқишини тартибга солиш, уларнинг яшаш шароитлари, миграция ҳисоби, вақтинчалик бошпана бериш ва фуқаролик олиш масалалари инобатга олинган.

АҚШ президенти Дональд Трамп разведка хизматига Венесуэлада махфий операциялар ўтказишга рухсат берганини айтди. Оқ уй нафақат денгизда, балки қуруқликда ҳам наркокартелларга зарба бериш имкониятини кўриб чиқмоқда. Бу ҳақда BBC хабар берди. Сўнгги ҳафталарда АҚШ ҳарбийлари Кариб денгизида гиёҳванд моддалар ташиётгани тахмин қилинган кемаларга камида 5 марта ҳужум қилди. Оқибатда 27 киши ҳалок бўлди. БМТнинг инсон ҳуқуқлари бўйича экспертлари бу ҳужумларни “суддан ташқари қатл” деб атади.

АҚШ президенти Дональд Трамп 15 октябрь, чоршанба куни Ҳиндистон бош вазири Нарендра Моди Россия нефтини сотиб олишни тўхтатишга ваъда берганини айтди. Трамп бу «қисқа вақт ичида» амалга ошишини айтди.

«Ҳиндистоннинг [Россиядан] нефть сотиб олишидан норози эдим ва у [Моди] бугун мени Россиядан нефть сотиб олмасликларига ишонтирди», деди Америка президенти Оқ уйда журналистларга.

15 октябрь куни кечқурун Ҳамас яна икки жасадни топширди. Бунгача Ҳамас 28 нафар ҳалок бўлган гаровдаги исроилликдан 7 нафарининг жасадини топширган, Исроил эса саккизинчи жасад гаровдагилардан бирига тегишли эмаслигини билдирган эди.

«Биз ўзимиздаги барча тирик исроиллик асирларни, шунингдек, қўлимиз етган жасадларни топшириш орқали келишувдаги мажбуриятимизни бажардик... Қолган жасадларни топиш ва чиқариб олиш эса катта саъй-ҳаракатлар ҳамда махсус техник воситаларни талаб қилади», дея Ал-Қассам бригадалари баёнотидан иқтибос келтирмоқда The Guardian нашри.

<iframe width="640" height="420" src="https://www.youtube.com/embed/VUQ31yJDTK8" title="Xalqaro dayjest" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Ирода Жўраева, Улуғбек Тўхтаев (видео), ЎзА