“Россия” авиакомпаниясига тегишли самолёт 24 сентябрь куни Шереметьево аэропортида бошқа борт билан тўқнашиб, зарар кўрди. Бу ҳақда авиаташувчига таяниб, «ТАСС» хабар берди. Маълум қилинишича, гап Москва – Санкт-Петербург рейси ҳақида кетмоқда.

Самолёт учишга тайёргарлик жараёнида йўлакда Ҳаинан Airlines авиакомпаниясининг Airbus А330 самолёти билан тўқнашган. Дастлабки маълумотларга кўра, “Россия” самолётининг қаноти бошқа бортнинг бошқарув қисмига теккан.

Даниянинг Олборг аэропорти ҳудудида номаълум дронлар аниқлангани сабаб ҳаво бандаргоҳи вақтинча ёпилди. Бу ҳақда BBC хабар берди. Oлборг аэропорти нафақат фуқаролик, балки ҳарбий авиация учун ҳам муҳим ҳисобланади. Полиция ҳолат юзасидан суриштирув бошлаб юборган, бироқ дронларнинг эгаси ва уларнинг мақсади ҳали аниқланмаган. Расмийлар зарурат туғилгудек бўлса, учувчисиз қурилмаларни уриб туширишга тайёр эканини маълум қилган.

Қозоғистон Россия ва Украина ўртасидаги ҳарбий можарода воситачи эмас, бироқ Путин ва Зеленский ўртасидаги учрашувни ўтказиши мумкин. Бу ҳақда Қозоғистон президенти Қосим-Жомарт Тоқаев маълум қилди. Президентнинг сўзларига кўра, Россия ва Украина барча масалаларда икки томонлама музокара ўтказишга қодир.

АҚШ президенти Дональд Трамп БМТ Бош Ассамблеяси доирасида араб ва Форс кўрфази давлатлари етакчилари билан учрашув ўтказди. Унда Трамп Ғазо ва Яқин Шарқ бўйича 21 банддан иборат тинчлик режасини тақдим этди. Бу ҳақда унинг Яқин Шарқ бўйича махсус вакили Стив Уиткофф Нью Йоркдан туриб маълум қилди.

Украина президенти Владимир Зеленский уруш тугаганидан сўнг президентлик лавозимидан кетишга тайёрлигини айтди. Бу ҳақда у Axios журналисти Барак Равидга берган интервьюсида маълум қилди. Зеленский тинчлик даврида мамлакатни бошқаришни давом эттирмоқчи эмаслигини билдирди. Шунингдек, ўт очишни тўхтатишга эришилса, парламентдан сайловларни ташкил этишни сўрашга ваъда берди. “Уруш тугагандан сўнг фаолиятингизни тугатасизми”, деган саволга Зеленский “тайёр” эканини айтди.

<iframe width="640" height="420" src="https://www.youtube.com/embed/V67Nm4u7ysY" title="Xalqaro dayjest" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Ирода Жўраева, Улуғбек Тўхтаев (видео), ЎзА