АҚШ президенти Дональд Трамп маъмурияти Ҳарвард университетини хорижлик талабаларга таълим бериш ҳуқуқидан маҳрум қилди. Ҳозирда Ҳарвардда ўқиётган хорижликлар бошқа университетга ўтишга мажбур бўлади, акс ҳолда улар мамлакатда қолиш ҳуқуқини йўқотади.

Университет маълумотларига кўра, 2024-ўқув йилида Ҳарвардда 7000 га яқин хорижлик талаба таҳсил олган. Бу умумий талабалар сонининг 27,2 фоизини ташкил этади.

Университет ўз баёнотида Трамп маъмуриятининг бу қадамини ноқонуний деб атади.

АҚШ президенти маъмурияти Жанубий Кореядан 4,5 минг нафар ҳарбийни олиб кетмоқчи. 

Маълум қилинишича, Жанубий Корея ҳудудида жами 28,5 мингга яқин АҚШ ҳарбийлари бор. Расмийлар қўшинларни Тинч океанига, жумладан, Гуам оролига кўчириш вариантларини кўриб чиқмоқда. Ташаббус Шимолий Кореяга қарши кураш сиёсати доирасида муҳокама қилинмоқда.

Дональд Трамп Владимир Путин билан яқинроқ муносабатлар ўрнатиш мақсадида учрашувни режалаштирмоқда. Манбаларга кўра, эҳтимолий саммит Украинадаги ҳарбий ҳаракатларни тўхтатиш бўйича музокараларни ўз ичига олмайди.

Зеленский Россия билан асирларни алмашиш бўйича “1000 га 1000” форматида йиғилиш ўтказди. Бу ҳақда президентнинг ўзи ижтимоий тармоқларда маълум қилган.

“Айирбошлашга тайёргарлик кўриш бўйича йиғилиш ўтказдим. Россия асирлигидан 1000 нафар фуқаромизни озод қилиш тўғрисидаги келишув Туркиядаги учрашувнинг деярли ягона амалий натижаси бўлди. Бу натижани таъминлаш учун ҳаракат қилмоқдамиз”, деди у.

Калифорния штатининг Сан-Диего шаҳрида самолётнинг турар жой мавзесига қулаши оқибатида бир неча киши вафот этди. 

BBC News’нинг хабар қилишича, самолётда учувчи билан бирга 8-10 киши бўлган бўлиши мумкин. Дастлабки маълумотларга кўра, зарар кўрган 15 та уйда яшовчиларнинг ҳеч бири жиддий жароҳат олмаган. Тахминан 100 киши хавфсиз жойга кўчирилган.

<iframe width="650" height="420" src="https://www.youtube.com/embed/XnkwaWxaN0Y" title="Хalqaro dayjest" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Ирода Жўраева, Улуғбек Тўхтаев, ЎзА