Ғазо секторида ўтин теришга чиққан икки бола Исроил ҳужуми оқибатида ҳалок бўлди. Бу ҳақда CNN хабар берди. Маълум қилинишича, 29 ноябрь куни эрталаб болаларнинг отаси Тамер Абу Асси нонушта тайёрлаётганида ўтин тугаганини пайқаган. 8 ёшли Фади ва 10 ёшли Жумаа отасининг имконияти чеклангани (ногирон бўлгани) сабабли ўтин олиб келишга кетган, бироқ қайтиб келмаган. Абу Асси дастурхон ёзиб, уларнинг қайтишини кутаётган вақтда яқин атрофдаги одамлар бошпанага югуриб келиб, икки бола Исроил аскарлари томонидан ўлдирилганини айтган.

Европа Иттифоқи Кенгаши ва Европарламент 2027 йилгача Россия табиий газини босқичма-босқич импорт қилишни тўхтатиш бўйича регламент юзасидан дастлабки келишувга эришди.

“Бу биз ва бутун Европа учун катта ғалаба. Европа Иттифоқининг Россия газига қарамлигига чек қўйишимиз керак. Унинг Европа ҳудудида доимий тақиқланиши — тўғри йўналишдаги муҳим қадам”, дейди Европа Иттифоқи Кенгашига раислик қилувчи Дания иқлим, энергетика ва коммунал хизматлар вазири Ларс Огард.

NASA ва бошқа бир нечта космик агентликлар одамларни Ойга қўндириш учун беллашмоқда. Бироқ ўтмишда NASA Ернинг табиий йўлдошида водород бомбасини портлатишни режалаштирган эди. Бу ҳақда Wion хабар берди. Маълум бўлишича, АҚШ ўта махфий А119 лойиҳаси доирасида 1969 йилда Нил Армстронг Ойга қўнишидан анча олдин Ойда бомба портлатишни мўлжаллаган.

Ҳиндистон ҳукумати фуқароларнинг смартфонларига давлат томонидан ишлаб чиқилган Sanchar Saathi иловасини ўрнатади. Apple, Samsung, Xiaomi ва бошқа ишлаб чиқарувчилар кейинги 90 кун ичида нафақат янги, балки аллақачон ишлатилаётган смартфонларда ҳам иловани ўчириб бўлмайдиган тарзда ўрнатиш имкониятини таъминлаши керак. Тегишли баёнот 1 декабрь куни Ҳиндистон ҳукуматининг Матбуот ахборот бюроси (ПИБ) томонидан эълон қилинди.  

Россия президенти Владимир Путин АҚШ маъмурияти таклиф этган тинчлик режасининг учта банди бўйича ён беришга тайёр эмас. Бу ҳақда хабардор россиялик манбага таяниб, NBC News маълум қилди. Манбанинг айтишича, Москва Донбасс ҳудуди, Украина армияси сонини чеклаш ва босиб олинган ҳудудларни халқаро миқёсда тан олиш масалаларида муросага боришни истамайди. АҚШ махсус вакили Стив Уиткофф 2 декабрь куни Кремлда Владимир Путин билан музокаралар ўтказди. Унда Украина билан келишилган тинчлик режаси лойиҳаси тақдим этилган.

АҚШ президенти Дональд Трамп ҳукумат йиғилишида наркотик ишлаб чиқариш ва етказиб беришга алоқадор давлатлар ва гуруҳларга қарши куч ишлатишга тайёрлигини айтди. У бунга мисол қилиб Колумбияни тилга олди. Йиғилиш YouTube’даги Оқ уй каналида жонли эфирда намойиш этилди.

“Мен Колумбияда кокаин ишлаб чиқарилишини эшитганман. Уларнинг кокаин ишлаб чиқарадиган заводлари бор, тушуняпсизми? Сўнгра улар ўз кокаинини бизга сотади. Биз буни жуда қадрлаймиз. Аммо бу билан шуғулланадиган ва уни мамлакатимизда сотадиган ҳар ким ҳужум учун нишонга айланади. Биз бу итваччаларни йўқ қиламиз”, деб таҳдид қилди АҚШ президенти.

<iframe width="650" height="420" src="https://www.youtube.com/embed/80bOGNfMQnQ" title="Xalqaro dayjest" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Ирода Жўраева, Улуғбек Тўхтаев, ЎзА