Украиналик депутат Алексей Гончаренко АҚШ президенти Дональд Трампнинг Украина бўйича тинчлик режасини эълон қилди. Ҳужжат ҳудудий масалалар, хавфсизлик ва халқаро мақом, энергетика, кафолатлар ва назорат, иқтисодий масалалар ҳамда гуманитар масалалар бўйича асосий қоидаларни ўз ичига олади. Ҳужжат барча томонлар қабул қилганидан сўнг зудлик билан ўт очишни тўхтатиш ва келишув бажарилишини назорат қилиш учун Дональд Трамп раислигида Тинчлик кенгашини тузишни назарда тутади.

Украина президенти Владимир Зеленский АҚШ армия вазири Дэниел Дрисколл билан учрашувда Вашингтон билан АҚШ маъмуриятининг янги тинчлик режаси устида ишлашга тайёрлигини билдирган. Бу ҳақда Axios хабар берди. Зеленскийнинг ўзи эса ҳар кунги мурожаатида Украина ва АҚШ делегациялари «урушни якунлаш бўйича режа бандлари устида ишлаши» ҳақида гапирган. Axios маълумотига кўра, Дрисколл 20 ноябрь куни Киевда бўлиб ўтган ўзаро музокаралар чоғида Зеленскийга режа нусхасини тақдим этган.

Бразилиянинг Белен шаҳрида COP30 иқлим конференцияси ўтказилиши режалаштирилган бинода ёнғин чиқди. Бу БМТнинг иқлим бўйича йирик анжумани ҳисобланади. Бу ҳақда BBC хабар берди. БМТнинг маълум қилишича, олти дақиқада ёнғин ўчирилган ва 13 кишига тутундан заҳарланиш сабабли тиббий ёрдам кўрсатилган. Ҳозирча ёнғиннинг сабаби аниқланмаган. Музокаралар иқлим ўзгаришига қарши курашиш бўйича кейинги қадамларни келишишнинг сўнгги босқичида эди. Аммо ёнғин туфайли музокаралар тўхтатилиб, йиғилишлар вақтинча ёпилган. Одамлар ёнғин туфайли бинодан эвакуация қилинган.

Шимолий кореялик ҳарбийлар 19 ноябрь куни қисқа муддатга ҳарбий демаркация чизиғини кесиб ўтди. Бу чизиқ Корея яриморолини ажратиб турувчи демилитаризация зонаси — яъни Шимолий ва Жанубий Корея ўртасидаги амалдаги чегара ҳисобланади. Бу ҳақда Yonhap хабар берди. Маълумотларга кўра, КХДР ҳарбийлари чегарада иш олиб борган. Уларнинг сони ва қуролланган ёки қуролланмагани юзасидан аниқ маълумот берилмаган. Жанубий Корея томони дастлаб огоҳлантириш берган, сўнг огоҳлантирувчи ўқ узган. Сеул вазиятга “кўрсатмаларга мувофиқ” муносабат билдирганини маълум қилди. Ўқ узилгач, Шимолий Корея ҳарбийлари ўз ҳудудига қайтган.

АҚШнинг Аризона штатида 5 та ҳайдовчилик гувоҳномаси билан трак ҳайдаган Ўзбекистон фуқароси ЙТҲдан сўнг қўлга олинди. Бу ҳақда Чегара қўриқлаш хизмати хабар берди. Маълум қилинишича, ўзбекистонлик ҳайдовчи Interstate 10 йўлидаги йўл-транспорт ҳодисасидан сўнг бешта ҳайдовчилик гувоҳномаси билан ушланган. Ўзбекистон фуқароси Байден президентлиги даврида АҚШга ноқонуний кирган. У 2025 йилда иммиграция судьясининг мамлакатни тарк этиш буйруғини бажармаган. Ҳайдовчилик гувоҳномасининг иккитаси Нью -Йорк ва учтаси Огайо штатига тегишли.

<iframe width="650" height="420" src="https://www.youtube.com/embed/wgp9-i8bMu0" title="Xalqaro dayjest" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Ирода Жўраева, Улуғбек Тўхтаев, ЎзА