АҚШда илк бор X-59 номли товушдан тез учувчи самолёт осмонга кўтарилди. Lockheed Martin компанияси NASA билан ҳамкорликда ушбу самолётнинг биринчи муваффақиятли синов парвозини амалга оширди. Бу ҳақда Reuters хабар берди. Синов парвози Калифорнияда ўтказилган, самолёт АҚШ ҳарбий-ҳаво кучларининг Plant 42 авиабазасидан ҳавога кўтарилиб, NASAнинг Армстронг номидаги тадқиқот маркази яқинига муваффақиятли қўнган. Парвоз натижалари ижобий бўлиб, самолётнинг учиш ва аэродинамик хусусиятларини тасдиқлаган.

АҚШда коронавирус ва бир нечта хавфли жинсий касаллик юқтирилган маймунлар йўлда ағдарилиб кетган юк машинасидан қочиб кетди. Бу ҳақда маҳаллий расмийларга таяниб, The New York Post хабар берди. Маймунлар Тулане университетига қарашли тадқиқот марказидан олиб кетилаётган бўлган. Уларни ташиётган юк машинаси 28 октябрь куни Ҳайделберг шаҳрида йўлдан чиқиб, ағдарилиб кетган. Тахминан 18 килограмм оғирликдаги бу маймунлар COVID, гепатит C ва герпес билан зарарланган бўлиб, инсонларга нисбатан тажовузкор ҳисобланади.

АҚШ Венесуэла президенти Николас Мадурони ўғирлаш учун унинг учувчисини ёллашга уринди. Аммо режа амалга ошмади. Бу ҳақда Associated Press хабар берди. АҚШнинг амалдаги ва собиқ расмийлари ҳамда Венесуэла мухолифатининг бир вакили маълумотни тасдиқлади. Президент учувчисини ёллаш режаси 2024 йил апрель ойида ишлаб чиқилган. Ўша пайтда АҚШ Ички хавфсизлик вазирлигининг 50 ёшли агенти Эдвин Лопес АҚШнинг Доминикан Республикасидаги элчихонасида атташе бўлиб ишлаган.

Россиянинг “Орешник” ракета мажмуаси декабрь ойида Беларусьда жанговар навбатчиликка қўйилади. Бу ҳақда Беларусь раҳбари Александр Лукашенконинг матбуот котиби Наталя Эйсмонт маълум қилди. Унинг сўзларига кўра, Беларусь ҳудудида “Орешник”ни жойлаштириш учун шароит яратиш жараёни тугамоқда.

Туркиянинг Истанбул шаҳрида ўзбекистонлик аёлни ўлдирган эркак “қасддан ўлдириш” жинояти учун умрбод қамоқ жазосига ҳукм қилинди. Унга айни воқеада аёлнинг сумкасини ўғирлагани учун алоҳида равишда 6 йил қамоқ жазоси ҳам берилди. Ахборотга кўра, жиноят 18 апрель куни Истанбулнинг Пендик тумани, Қайнаржа маҳалласида содир этилган. Ҳодиса бирга яшаб келган жуфтлик ўртасидаги жанжал туфайли содир бўлган.

<iframe width="650" height="420" src="https://www.youtube.com/embed/MaREaPp1mYk" title="Xalqaro dayjest" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Ирода Жўраева, Улуғбек Тўхтаев, ЎзА