Эрон президенти Масъуд Пезешкиён бензин нархининг ошиши муқаррар эканини айтиб, аҳолини ижтимоий рисклардан огоҳлантирди. Бу ҳақда Iran International хабар берди. Сиёсатчи Эрондаги кучайиб бораётган энергия танқислигини ҳал этиш учун ёнилғи нархи оширилишини таъкидлади. Бироқ буни “эҳтиёткорлик билан режалаштириш кераклиги”, акс ҳолда иқтисодий қийинчиликлар янада чуқурлашишини билдирди.

Россия президенти Владимир Путин ёшларни ўқиш ва карьерага эътибор қаратиб, фарзанд кўришни “кейинроққа” қолдирмасликка чақирди. Сиёсатчи Кремльда демографик ва оилавий сиёсат бўйича йиғилиш ўтказди. Бу ҳақда Тhе Моscоw Times хабар берди.

“Биз одамларга оталик ва оналик бахт эканини, бахтни кечиктирмаслик кераклигини етказишимиз керак”, деди Путин.

АҚШ президенти Дональд Трамп дунёдаги энг йирик Binance криптовалюта биржаси асосчиси Чанпен Чжаони афв этди. Бу ҳақда The Wall Street Journal хабар берди. Маълумотларга кўра, бу қарор Чжаонинг “Трамп оиласига тегишли криптокомпанияни ривожлантиришга қаратилган бир неча ойлик саъй-ҳаракатларидан сўнг” қабул қилинган. Президентнинг афв ҳақидаги фармони 22 октябрь куни имзоланган. Оқ уй матбуот котиби Керолайн Левитт афв ҳақиқатдан ҳам амалга оширилганини тасдиқлади.

Россиянинг Су-30 ва Ил-78 самолётлари 23 октябрь куни кечқурун Литва ҳаво ҳудудига бузиб кирди. Самолётлар Калининград вилоятидан чегарадаги Кибартай шаҳри ҳудудига бостириб кирган. Авиатехникалар Литва ичкарисига 700 метр кириб боргач, мамлакат ҳаво ҳудудини тарк этган. Қоидабузарлик 18 сония давом этган. Ҳодиса сабабли НАТО ҳаво полицияси миссиясининг қирувчи самолётлари — Eurofighter Typhoon (Испанияга тегишли) кўтарилган.

АҚШ президенти маъмурияти Аляска қирғоқларида янги нефть ва газ конларини ўзлаштиришга қўйилган тақиқни бекор қилди. Бу ҳақда Ички ишлар вазирлигига таяниб, The Guardian хабар берди. Вазирлик баёнотига кўра, ушбу ҳудудда энергия манбаларининг энг йирик ўзлаштирилмаган захиралари мавжуд. Бу АҚШ энергия хавфсизлигини мустаҳкамлашга имкон беради. Шу тариқа 2024 йилда собиқ президент Жо Байден маъмурияти томонидан жорий этилган чекловлар олиб ташланмоқда. Эндиликда Аляскада 6,3 минг квадрат километрдан ортиқ ҳудуд қазиб олиш учун очилади.

<iframe width="650" height="420" src="https://www.youtube.com/embed/WbqzGVE8NFw" title="Xalqaro dayjest" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Ирода Жўраева, Улуғбек Тўхтаев, ЎзА