Германиянинг Мюнхен халқаро аэропортида 2 октябрь куни номаълум дронлар кўрингани сабабли 17 та авиақатнов бекор қилинди. Яна 15 та самолёт бошқа шаҳарлардаги аэропортларга йўналтирилди. Бу ҳақда BBC хабар берди. Таъкидланишича, ушбу ҳолат оқибатида қарийб 3 минг йўловчининг парвози кечиктирилган. Ҳаво ҳаракати вақтинча тўхтатилган, самолётлар эса Штутгарт, Нюрнберг, Вена ва Франкфурт шаҳарларига йўналтирилган.

Венесуэла расмийлари 2 октябрь куни Кариб денгизи ҳаво ҳудудида АҚШга тегишли 5 та ҳарбий самолёт аниқланганини маълум қилди. Бу ҳақда CNN хабар берди. Мамлакат мудофаа вазири Владимир Падрино бу ҳолатни АҚШ томонидан қасддан уюштирилган провокация деб баҳолаб, уни миллий хавфсизликка таҳдид деб атамоқда.

“Газпром”нинг Европадаги энг йирик харидори бўлган Венгрия Туркманистондан газ сотиб олишни режалаштирмоқда. Бу ҳақда мамлакатнинг Шарқий алоқаларни ривожлантириш бўйича давлат котиби ўринбосари Адам Штифтер хабар берди. 2 сентябрь куни Венгрия мамлакат тарихидаги энг узоқ муддатли суюлтирилган табиий газ импорти бўйича шартнома имзолади. Ушбу келишув Франциянинг Engie компанияси билан тузилган бўлиб, 2028 йилдан 2038 йилгача амал қилади. Етказиб беришнинг умумий ҳажми 4 миллиард куб метрни ташкил этади.

Франция ҳукумати Россиянинг санкцияга учраган “соя флоти”га алоқадор деб гумон қилинаётган танкер кемаси — Boracay капитанини ва биринчи офицерини қўлга олди. Бу ҳақда мамлакат мудофаа вазири Себастен Лекорну 2 октябрь куни маълум қилди.

“Француз денгизчиларининг тезкор ҳаракати туфайли ҳозирда Сен-Назер порти яқинида тўхтаб турган рус танкеридаги икки нафар экипаж аъзоси қўлга олинди”, деб ёзган Лекорну ўзининг ижтимоий тармоқдаги саҳифасида.

Францияда давлат харажатларини қисқартириш режалари ва ижтимоий таъминотдаги ўзгаришларга қарши кенг кўламли норозилик намойишлари бўлиб ўтмоқда. 2 октябрь куни мамлакат бўйлаб 200 дан ортиқ шаҳар ва шаҳарчаларда одамлар кўчаларга чиқиб, иш ташлаш эълон қилди. Намойишлар туфайли Париждаги машҳур Эйфель минораси вақтинча ёпилди. Бу ҳақда Euronews хабар берди. Парижда тахминан 24 минг киши, жумладан ишчи, нафақахўр ва талабалар “Италия майдони”да юриш қилган. Мамлакат бўйлаб эса, касаба уюшмалари маълумотига кўра, 600 мингга яқин одам намойишларда қатнашган.

<iframe width="650" height="420" src="https://www.youtube.com/embed/llqeDJodT-I" title="XALQARO DAYJEST" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Ирода Жўраева, Улуғбек Тўхтаев, ЎзА