АҚШ президенти Дональд Трамп бўлган вертолётга лазер нури йўналтирилди. Ҳодиса Оқ уй яқинида содир бўлди. Бу ҳақда NBC News хабар берди. Полиция маълумотига кўра, лазер нурини йўналтирган 33 ёшли Жейкоб Самуэл қўлга олинган. Ҳодиса куни Махфий хизмат ходими Оқ уй яқинида номаълум шахсни аниқлаган. Терговчиларнинг айтишича, унинг ёнидан тиғли пичоқ ҳам топилган. Қонунга кўра, лазер нурини самолётга йўналтириш федерал жиноят ҳисобланади ва бу 5 йилгача қамоқ ҳамда 250 минг долларгача жаримани назарда тутади.

Исроил бош вазири Биньямин Нетаньяху АҚШ президенти Дональд Трампдан Фаластин ҳудудларини ўзига қўшиб олиш учун “яшил чироқ” кутмоқда. Бу ҳақда Axios портали ўз манбаларига таяниб хабар бермоқда. ​Axios’нинг ёзишича, сентябрь ойи бошида Нетаньяху АҚШ Давлат котиби Марко Рубио билан Қуддусда учрашганда, Фаластинни ўзига қўшиб олишнинг турли вариантларини кўриб чиқаётганини айтган.

Украина Россия бошлаб берган урушни тўхтатиш ва украиналик болаларни ватанга қайтариш устида ишламоқда. Бу ҳақда БМТ ташкил этилганининг 80 йиллиги муносабати билан ўтказилаётган йиғилишда мамлакат президенти Владимир Зеленский маълум қилди.

“Биз Россия агрессиясини унутмаймиз. Урушни тўхтатиш учун бор кучимизни сарфламоқдамиз. Болаларимиз учун узоқ муддатли хавфсизликни таъминлаш йўлида ишламоқдамиз”, деган Украина президенти.

Франция президенти Эммануэль Макрон Фаластинни давлат сифатида тан олганини эълон қилди. Франция раҳбари 22 сентябрь куни БМТнинг Нью-Йоркдаги бош қароргоҳида нутқ сўзлади. У ерда Франция ва Саудия Арабистони ташаббуси билан давлат ва ҳукумат раҳбарлари саммити ўтказилмоқда.

Кейинроқ худди шу йиғилишда Бельгия бош вазири Барт Де Вевер, шунингдек, Монако, Малта ва Люксембург раҳбарлари ҳам Фаластинни давлат сифатида тан олганларини эълон қилди. Буюк Британия, Канада, Австралия ва Португалия 21 сентябрь куни Фаластин давлатини тан олган эди. Тегишли қарор кейинчалик Португалия томонидан ҳам қабул қилинган. Саудия Арабистони ташқи ишлар вазири шаҳзода Файсал бин Фархон Ол Сауд бошқа давлатларни ҳам шундай йўл тутишга чақирган.

Украина президенти Владимир Зеленский қозоғистонлик ҳамкасби Қосим-Жомарт Тоқаев билан учрашганини маълум қилди. Бу ҳақда сиёсатчи ўзининг Telegram каналида хабар берди. Зеленский ўз баёнотида Украинанинг суверенитети ва ҳудудий яхлитлигини қўллаб-қувватлагани учун Қозоғистонга миннатдорлик билдирди. Учрашув БМТ Бош Ассамблеясининг 80-сессияси доирасида бўлиб ўтган. Унда етакчилар икки томонлама иқтисодий ва гуманитар ҳамкорлик масалаларини муҳокама қилган. Владимир Зеленский Украинадаги вазият бўйича ўз фикрини билдирган.

<iframe width="650" height="420" src="https://www.youtube.com/embed/GTmAMKfiBYs" title="Xalqaro dayjest" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Ирода Жўраева, Улуғбек Тўхтаев, ЎзА