АҚШ Давлат департаменти 16 сентябрь куни Green Card’га ариза топшириш учун 1 доллар тўлов жорий этилишини маълум қилди.

Жорий этилаётган тўлов электрон шаклда, рўйхатдан ўтиш вақтида ундирилиши кўзда тутилган. Департамент ҳисоб-китобларига кўра, ушбу ташаббус орқали тахминан 25 миллион доллар маблағ фойда кўрилиши кутилмоқда.

Афғонистоннинг “Толибон” ҳаракати Мозори Шариф шаҳрида Wi-Fi хизматларини буткул узиб қўйди ва бутун мамлакат бўйлаб оптик толали интернет тармоғини тўхтатди. Бу ҳақда Afghanistan International хабар берди. Мозори Шариф аҳолисининг айтишича, 15 сентябрь куни “Толибон” расмийлари интернет провайдерларига шаҳарда Wi-Fi хизматларини ўчиришни буюрган. Маҳаллий телекоммуникация компаниялари эса бу қарорни тасдиқлаган.

Ғазо шаҳрида сўнгги ерусти ҳарбий амалиётнинг биринчи куни давомида қарийб 350 минг фаластинлик ҳудудни тарк этгани маълум қилинди. Бу ҳақда Исроил армиясига таяниб, Euronews хабар берди. Расмийларнинг таъкидлашича, вайронага айланган шаҳар ҲАМАСнинг “асосий таянч нуқтаси” сифатида қаралмоқда. Фаластинликлар 16 сентябрь куни тонгда Ғазо шаҳри бўйлаб кучли бомбардимонлар кузатилганини билдирган. Шифохоналарда камида 69 кишининг ҳалок бўлгани қайд этилган.

Колумбия ҳукумати 16 сентябрь куни АҚШдан ҳарбий қурол-аслаҳа харид қилишни тўхтатишини маълум қилди. Бу ҳақда Al Arabiya хабар берди. Бунга сабаб — Вашингтон расмийлари Жанубий Америка давлатини кокаин савдосига қарши курашда муваффақиятсизликда айблаб, уни расмий “гиёҳвандликка қарши иттифоқчи” мақомидан маҳрум қилгани бўлган. Ушбу қарор АҚШ президенти Дональд Трампнинг кескин баёнотидан сўнг эълон қилинмоқда. У Колумбия президенти Густаво Петро кокаин ишлаб чиқаришни тўхтатмагани, балки уни тарихий рекорд даражагача ошириб юборганини таъкидлаганди. Шунингдек, Колумбия гиёҳвандликка қарши мажбуриятларини аниқ бажармаган давлат сифатида қайта таснифланган.

Еврокомиссия Ғазодаги урушга жавобан Исроилга савдо босими ўтказишни таклиф этмоқда. Бу ҳақда Евроиттифоқ ташқи ишлар раҳбари Кая Каллас маълум қилди. Маълум қилинишича, Европа Иттифоқига импорт қилинадиган Исроил маҳсулотлари учун имтиёзли режим бекор қилиниши мумкин. Каллас бундай чора Исроил учун қимматга тушишини айтди.

<iframe width="640" height="420" src="https://www.youtube.com/embed/A0nKOvYduTM" title="Xalqaro dayjest" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Ирода Жўраева, Улуғбек Тўхтаев, ЎзА