AҚШ президенти Дональд Трамп Мудофаа вазирлигини эндиликда «Уруш департаменти» деб номлашни режалаштирмоқда. У 5 сентябрь куни тегишли фармонни имзолаб, Пентагон номини иккиламчи равишда «Уруш департаменти» сифатида расмийлаштиради. Бу ҳақда BBC хабар берди. Режага кўра, амалдаги мудофаа вазири Пит Хегсет эндиликда «Уруш вазири» деб юритилади. AҚШ қуролли кучларини назорат қилувчи Пентагон 1789 йилда вазирлар маҳкамаси даражасидаги агентлик сифатида ташкил этилган ва 1947 йилгача мавжуд бўлган Уруш департаментнинг вориси ҳисобланади.

Россия президенти Владимир Путин украиналик ҳамкасби Владимир Зеленскийни Москвада учрашувга таклиф қилганди. Зеленский мазкур таклиф музокараларни чўзишга қаратилганини айтди ва унга рад жавобини берди. 

«Америкалик ҳамкорлар Путин мени Москвага таклиф қилганини етказди. Учрашув бўлмасин десанг, мени Москвага таклиф қил. Менимча, шу сабабли Россия учрашув ҳақида гапира бошлади — бу ёмон эмас. Аммо ҳозирча биз уларнинг урушни тугатиш истагини кўрмаяпмиз. Катта етакчилар бундай даражадаги учрашувдан натижа билан чиқиши керак. Энг яхшиси – урушнинг тугаши билан», деди Зеленский.

Шимолий Корея етакчиси Ким Чен Ин 3 сентябрь куни Россия президенти Владимир Путин билан учрашган эди. Мазкур учрашув тугагач Кимнинг қўриқчилари у тегинган барча нарсаларни олиб кетди, хонада қолганларини эса артиб қўйди. Бу ҳақда Reuters хабар берди. Таҳлилчиларнинг айтишича, бундай ҳаракатлар чет эл жосусларига қарши курашиш ва Кимнинг соғлиғи ҳақидаги ҳар қандай маълумотни яширишга қаратилган. Бундай протокол Шимолий Корея раҳбарининг отаси давридан бери амал қилади. Ижтимоий тармоқларда тарқалган видеода Пекиндаги музокаралардан сўнг Ким Чен Ин ўтирган стул артилиб, сув ичган стакани олиб кетилганини кўриш мумкин.

Афғонистоннинг жануби-шарқида 4 сентябрь куни кечаси 5,6 магнитудали зилзила юз берди. Бу сўнгги 6 кун ичида қайд этилган учинчи кучли ер силкиниши бўлди. Бу ҳақда BBC хабар берди. Маҳаллий вақт билан 20:56 да содир бўлган ер силкинишининг кучи айниқса, Нангарҳор ва Кунор провинцияларида яққол сезилган. Расмийлар ҳозирча сўнгги зилзила бўйича қурбонлар ҳақида маълумот бермаган. Бироқ, BBC’нинг маҳаллий тиббиёт ходимларига таяниб ёзишича, Кунор шифохонасига камида 17 нафар жароҳатланган киши етказилган.

Непал 4 сентябрь куни ҳукумат рўйхатидан ўтмаган йирик ижтимоий тармоқлар фаолиятини тўхтатди. Бу ҳақда маҳаллий нашрларга таяниб, Аnadolu хабар берди. Мамлакатнинг Алоқа ва ахборот технологиялари вазирлиги компанияларга 28 августдан бошлаб 7 кун ичида рўйхатдан ўтиш талаби қўйилганини маълум қилган. Белгиланган муддат 3 сентябрь куни якунланган. Шундан сўнг, рўйхатдан ўтмаган платформалар — АҚШнинг Меtа компаниясига тегишли Facebook, Instagram ва WhatsApp, шунингдек YouTube, X (собиқ Тwitter), Reddit ҳамда LinkedIn ижтимоий тармоқлари блокланган.

<iframe width="650" height="420" src="https://www.youtube.com/embed/fDS_-cuMuGg" title="Xalqaro dayjest" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Ирода Жўраева, Улуғбек Тўхтаев, ЎзА