Исроил армияси 30 июнь куни Ғазо шаҳридаги “Ал-Бақа” кафесига авиазарба берди. Оқибатда 40 дан ортиқ одам ҳалок бўлди. Ал-Шифо шифохонаси директори доктор Муҳаммад Абу Силмия кечаси берилган зарба оқибатида камида 41 киши ҳалок бўлгани ва 75 киши жароҳатланганини айтган. Исроил мудофаа кучлари ҳодиса “ўрганилаётганини” маълум қилган.

Россияда 1 июлдан бошлаб Ягона биометрик тизимда рўйхатдан ўтмаган чет эл фуқаролари мобил алоқадан узилади. 2025 йилдан бошлаб хорижликлар алоқа оператори билан фақат биометрик маълумотларни топширган тақдирда шартнома тузиши мумкин. Улар ўз номларига 10 тагача SIM-карта расмийлаштира олади. Шартномани аввалроқ тузганлар 1 июлгача биометрик маълумот топшириши керак эди.

Эронлик хакерлар АҚШ президенти Дональд Трамп ёрдамчилариннг электрон почта хабарларини ошкор қилиш билан таҳдид қилди. “Роберт” тахаллуси остидаги хакерлар Reuters агентлигига 30 июнь ва 1 июль кунлари алоқага чиққан. Улар Оқ уй маъмурияти раҳбари Сюзи Уайлс, АҚШ президенти адвокати Линдси Ҳаллиган, маслаҳатчиси Рожер Стоун ва рақиби Сторми Дэниэлснинг тахминан 100 гигабайт электрон почта хабарлари борлигини айтган.

АҚШ президенти Дональд Трамп 2004 йилдан бери амалда бўлган Сурияга қарши иқтисодий санкцияларни бекор қилиш тўғрисидаги фармонни имзолади. Оқ уй Сурияга нисбатан санкцияларининг бекор қилинишини “барқарорлик ва тинчлик сари қадам” дея баҳолаган.

Беларусь президенти Александр Лукашенко 30 июнь куни фуқароларга мурожаат қилиб, “мамлакатда уруш йўқлиги учун амалдаги ҳокимиятга дуо қилишлари ва миннатдор бўлишлари” кераклигини айтди. Лукашенко мамлакатда “ҳарбий ҳолатга ўхшаш вазият” юзага келганини таъкидлади. У буни қишлоқ хўжалигидаги тобора чуқурлашаётган муаммолар билан изоҳлади. Беларусь президенти амалдорларни “ўз ерининг эгаси бўлишга” ва кадрлар ҳаракатини қатъий назорат қилишга чақирди.

<iframe width="650" height="420" src="https://www.youtube.com/embed/Uc1bLhJXTVc" title="Isroil G‘azodagi kafega aviazarba berdi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Ирода Жўраева, Улуғбек Тўхтаев, ЎзА