Мамлакатимиз сиёсий ҳаётида 2023 йилнинг 9 июль санаси тарихий кун сифатида муҳрланди. Яъни Янги Ўзбекистоннинг кейинги 7 йиллик келажаги ва тараққиёт тақдирини белгилаб берувчи Ўзбекистон Республикаси Президентлигига сайлов бўлиб ўтди.

Бу сайлов очиқлик, шаффофлик ва тўлиқ демократик тамойилларга асосланган ҳолда бўлиб ўтганлигини дунё ҳамжамияти эътироф этди. Ўзбекистонда фаолият юритаётган етакчи партиялардан Тадбиркорлар ва ишбилармонлар ҳаракати – Ўзбекистон Либерал демократик партияси ва Ўзбекистон Миллий тикланиш демократик партияси томонидан илгари сурилган номзод Шавкат Миромонович Мирзиёев 87,5 фоиздан кўпроқ овоз олиб, Ўзбекистон Республикаси Президенти этиб сайланди.  

Марказий Сайлов Комиссияси томонидан Сайлов натижаларининг эълон қилиниши халқимиз томонидан катта хурсандчилик билан кутиб олинди.  

Жумладан, биз бухороликлар ҳам Шавкат Мирзиёевнинг сиёсий иродаси, давлатимизнинг оқилона сиёсати ҳамда “Инсон қадри учун” тамойили асосида бошланган демократик ислоҳотларнинг бардавом бўлишини катта мамнуният билан кутиб олдик.  

Сайлов жараёнларида халқимизнинг фаол иштирокига, фуқароларимиз дунёнинг қайси бурчагида бўлмасин, мамлакат ва халқ келажагига бефарқ эмаслигини намойиш этганлигига бутун дунё гувоҳ бўлди.  

Шавкат Мирзиёевнинг сайловолди дастурлари доирасида “Янги Ўзбекистон тараққиёт стратегияси”ни ўзида мужассам этган “Бизнинг мақсадимиз аниқ ва ўзгармасдир – демократик давлат ва фуқаролик жамияти қуриш йўлини янада қатъий давом эттирамиз” мавзусидаги чиқишлари билан барчамиз яқиндан танишмиз.  

Демак, ана шу мақсад сари дадил қадамлар билан халқ сайлаган Президент раҳнамолигида келажак сари одимлаймиз.  

Абира Ҳусейнова

Олий Мажлис Сенати аъзоси