“Ўзбек геология қидирув” акциядорлик жамиятида “Адолат” СДП билан ҳамкорликда Халқаро коррупцияга қарши кураш кунига бағишланган “Коррупциясиз жамиятни бирга қурамиз!” мавзусида тадбир ташкил этилди.

Унда Тоғ-кон саноати ва геология вазирлиги, “Адолат” СДП ва “Ўзбек геология қидирув” АЖ ходимлари иштирок этди. 

Тадбирда қайд этилганидек, мамлакатимизда коррупцияга қарши курашиш соҳасида қатор ислоҳотлар амалга оширилмоқда. Сўзга чиққанлар бу борада эришилаётган натижалар ва коррупцияни келтириб чиқарувчи омиллар ҳамда мазкур соҳада қабул қилинган қонунчилик ва ички меъёрий ҳужжатлар тўғрисида батафсил маълумот берди.

Олий Мажлис Қонунчилик палатасидаги «Адолат» СДП фракцияси раҳбари ўринбосари Муҳаммад Валиев бугунги кунда Ўзбекистонда коррупцияга қарши курашда фақат жиноий жавобгарлик эмас, балки превентив чоралар, рақамли мониторинг, жамоатчилик иштирокини ошириш, ички назорат тизимларини такомиллаштириш ва халқаро стандартларга мослаштириш каби кенг кўламли ишлар амалга оширилаётганини таъкидлаб ўтди. 

Шунингдек, “Ўзбек геология қидирув” АЖда коррупцияга қарши курашиш борасида амалга оширилаётган ишлар тўғрисида ҳам маълумотлар берилди.

Қайд этилганидек, мазкур жамиятда коррупцияга қарши курашиш менежмент тизими асосида ички назорат бўлими ташкил этилди. Бўлим коррупцияга қарши давлат сиёсатини юритиш ишлари билан шуғулланиб, халқаро стандарт талабларига асосан ишлаш тизимини йўлга қўйди. 

2023 йил жамиятда коррупцияга қарши курашиш менежмент тизими халқаро компания томонидан аудитдан ўтказилди ва халқаро ISО 37001:2016 стандарт сертификатини қўлга киритди.

Коррупцияга қарши менежмент тизими бўйича акциядорлик жамиятида шаффофлик ва очиқлик таъминланди. Ишга қабул қилиш жараёнлари тартибга солинди, инсон омилини камайтириш, манфаатлар тўқнашувларини бошқариш, контрагентлар билан ишлаш йўриқномалари ишга туширилди.

Бундан ташқари, бухгалтерия ҳисобини юритишнинг халқаро стандарт талабига ўтилди, ходимларнинг коррупцияга қарши ҳуқуқий билими мунтазам ошириб борилиши йўлга қўйилди.

Шунингдек, акциядорлик жамиятида ҳар қандай коррупциявий ҳолатлар бўйича хабарни етказиш мақсадида ишонч алоқа каналлари ташкил этилган. 2024 йил якунлари бўйича жамиятда коррупцияга қарши курашиш тизими самарадорлик кўрсаткичи 84 балл, яъни “яхши” натижани қайт этди.

Тадбир давомида коррупцион хатти-ҳаракатларнинг олдини олишда ходимлар орасида ҳалоллик маданиятини ошириш, тендер жараёнларида шаффофликни таъминлаш, мансаб ваколатларининг суиистеъмол қилинишига йўл қўймаслик муҳимлиги таъкидланди. 

Муҳтарама Комилова, ЎзА