Халқаро коррупцияга қарши кураш куни муносабати билан Самарқанд давлат ветеринария медицинаси, чорвачилик ва биотехнологиялар университети Нукус филиалида маънавий-маърифий тадбир ўтказилди.

Унда талабалар билан коррупциянинг моҳияти ва унинг хавфли оқибатларини англашга қаратилган очиқ мулоқот ўтказилди.

Таъкидланганидек порахўрлик, ижтимоий истеъмол учун мўлжалланган товар ва хизматларни ноқонуний ўзлаштириш, уруғ-аймоқчилик, маҳаллийчилик каби кўринишларга эга бўлган коррупция ижтимоий-иқтисодий ривожланишга путур етказувчи жиддий жиноят ҳисобланади. Бирлашган Миллатлар Ташкилоти ташаббуси билан 2004 йилдан бошлаб ҳар йили 9 декабрда Халқаро коррупцияга қарши курашиш куни бутун дунёда нишонланади. Ушбу иллатга қарши курашиш мамлакатимизда ҳам давлат фаолиятининг асосий йўналишларидан бирига айланган.

Тадбир доирасида “Ёшлар коррупцияга қарши!” мавзусида плакатлар танлови ташкил этилди. Унда иштирокчилар ўз ғояларини ранг, сиймо ва мазмун уйғунлигида ифода этиб, коррупцияга нисбатан шахсий муносабатларини яққол акс эттиришди.  

“Ҳалоллик — биздан бошланади" шиори остида ўтказилган танлов якунида 1-курс магистранти Н.Сабитова биринчи, 2-курс талабаси У. Турғанбаева иккинчи, 1-курс талабаси А. Ильясов эса  учинчи ўринни эгаллади.

Довуд Абибуллаев, ЎзА мухбири