Әлемдегі ең ірі IT-компаниялардың бірі Microsoft өнімдеріне бағытталған хакерлік шабуыл АҚШ Энергетика министрлігіне қарасты Ұлттық ядролық қауіпсіздік басқармасына да әсерін тигізді.

Bloomberg агенттігінің хабарлауынша, кибершабуыл «Microsoft SharePoint» платформасын нысанаға алған. Алайда АҚШ Энергетика министрлігі жағдайды бақылауға алғанын, құпия ақпараттың жария болмағанын, ал зардап шеккен жүйелер мамандар тарапынан қалпына келтіріліп жатқанын мәлімдеді. Министрлік бұл шабуылдың елеулі зиян келтірмегенін де нақтылады.

Агенттік хабарында бұл кибершабуылдың салдары АҚШ-тың Білім министрлігі, бірқатар федералдық агенттіктер, тіпті Еуропа мен Таяу Шығыс елдерінің үкіметтік жүйелеріне де тарағаны атап өтілген.

Microsoft компаниясы бұл шабуылдардың артында «Linen Typhoon» және «Violet Typhoon» деп аталатын Қытаймен байланысы бар деп есептелетін хакерлік топтар тұруы мүмкін екенін алға тартып отыр. Бұл топтар бұған дейін де мемлекеттік инфрақұрылымға бағытталған күрделі шабуылдармен танылған.