“INFOLIB UZBEKISTAN – 2022” XI Milliy axborot-kutubxona haftaligi doirasida Qoraqalpog‘iston Respublikasi Axborot-kutubxona markazida, o‘quv yurtlarida kitob ko‘rgazmalari, taqdimotlar, viktorina o‘yinlari, yozuvchi va shoirlar bilan uchrashuvlar, davra suhbatlari tashkil etildi.

Jumladan ochilish marosimida yozuvchi-shoirlar, Ajiniyoz nomidagi Nukus davlat pedagogika instituti professor-o‘qituvchilari, talaba yoshlari, I. Yusupov nomidagi ijod maktabi o‘quvchilari, kitobxonlar klubi a’zolari va faol kitobxonlar ishtirok etdi.

Ta’kidlanganidek, milliy axborot-kutubxona haftaligini o‘tkazishdan maqsad, axborot-kutubxona sohasini rivojlantirish, axborot-kutubxona foydalanuvchilariga sifatli xizmat ko‘rsatish, yoshlar ma’naviyatini ko‘tarish, ular o‘rtasida kitobxonlik madaniyatini targ‘ib qilish, yoshlarning intellektual bilim va ko‘nlikmalarin oshirishdan iborat.

Haftalik doirasida “Xalq ardog‘idagi yozuvchi” mavzusida xotira kechasi, aholi, ayniqsa yoshlar dunyoqarashini kengaytirish, intellektual saviyasini oshirish, ma’naviy olamini boyitish, kitob o‘qishga qiziqtirish va kitob o‘qish madaniyatini oshirishga qaratilgan yangi kitoblar taqdimoti, “Xalq donoligi” mavzusida kvest o‘yini, oliy o‘quv yurtlari talabalari hamda umumta’lim maktablari o‘quvchilari ishtirokida “Yangi adabiyotlar bilan tanishing”, “Yubilyar kitoblar” mavzularida kitob ko‘rgazmalari tashkil etildi. Shuningdek,  “Axborot – kutubxona markazlari faoliyatini muvofiqlashtirish yo‘nalishlari”, “Avtomatlashtirilgan kutubxona tizimlarini yaratish texnologiyalari va amaliyotining natijalari”, “Davlat standartlariga muvofiq adabiyotlarning bibliografik ro‘yxati” mavzularida seminarlar o‘tkazildi.

Ayniqsa, O‘zbekiston xalq yozuvchisi A.Qahhor tavalludining 115 yilligiga bag‘ishlangan “Ko‘p qirrali qalam sohibi” zakovat o‘yini, “Eng faol kitobxon yoshlar yetakchisi” viktorinasi, O‘zbekiston va Qoraqalpog‘iston Yozuvchilar uyushmasi a’zosi, shoir, jurnalist Abatgul Tajimuratova ijodiga bag‘ishlangan “Mutolaa olamidagi kitobxon ayol” mavzusidagi uchrashuv, qilichbozlik bo‘yicha Osiyo chempioni, Tokio olimpiadasi ishtirokchisi Sh.Mamutov,  Osiyo chempioni, Jahon kubogi g‘olibi F.Genjaboyev, O‘zbekiston chempioni, Osiyo o‘yinlari sovrindori I.Yusupbayev va “Nihol” mukofoti sovrindori D.Yendirbayev bilan uchrashuv yosh kitobxonlarda katta taassurot qoldirdi.

Mamlakatimizda o‘n birinchi marta o‘tkazilgan ushbu haftalik mutolaa madaniyatini rivojlantirish, sohada amalga oshirilayotgan keng ko‘lamli ishlarni kitobxonlarga yaqindan tanishtirish, aholini, shu jumladan yoshlarni ziyo maskanlariga jalb qilishda muhim ahamiyatga ega bo‘ldi.  

Dovud ABIBULLAEV,  

Maqsad HABIBULLAEV (surat), O‘zA