Ассалому алайкум. ЎзА виртуал мухбири сизларни ўтган ҳафтада содир бўлган муҳим воқеа ва ҳодисалар тафсилотлари билан таништиради.

Ўзбекистон Президенти Шавкат Мирзиёев йигирманчи декабрь куни фаол тадбиркорлар билан учрашди. Мураккаб геосиёсий шароитга қарамай, бу йил Ўзбекистон иқтисодиёти олтию ўндан уч фоизга ошиб, бир юз ўн бир миллиард доллардан кўпайди. Саноат, қишлоқ хўжалиги ва хизматлар соҳасига ўттиз саккиз миллиард доллар инвестиция кирди, экспорт йигирма олти миллиард доллардан ошди.

Шавкат Мирзиёев бу натижаларда, аҳолини иш билан таъминлаш ва камбағалчиликни қисқартиришда тадбиркорларнинг ўрни катта эканини таъкидлаб, уларга миннатдорлик билдирди.

Бу суръатни давом эттириб, келгуси йилда ялпи ички маҳсулотни бир юз йигирма миллиард долларга ва экспортни ўттиз миллиардга етказиш, қирқ икки миллиарддан зиёд инвестиция жалб этиш мўлжалланмоқда.

Шунингдек, учрашувда тадбиркорликка оид қонунчиликни Жаҳон савдо ташкилоти ва замон талабларига мослаштириш мақсадида янгиланган Божхона кодекси лойиҳаси ишлаб чиқилиши белгиланди.

***

Ўзбекистон Республикаси Президенти Шавкат Мирзиёев ўн еттинчи декабрь куни телефон орқали Қатар Давлати Амири Шайх Тамим бин Ҳамад Ол Сонийни миллий байрам - Қатар давлатига асос солинган кун билан табриклади ва дўст Қатар халқига тинчлик-осойишталик ва равнақ тилади.

Суҳбат чоғида давлат раҳбарлари икки минг йигирма бешинчи йилда бўлажак тадбирлар режасига, шу жумладан "Марказий Осиё - Кўрфаз араб давлатлари ҳамкорлик кенгаши" мулоқотининг иккинчи саммитини ўтказишга алоҳида эътибор қаратди.

***

Ўзбекистон Республикаси Президенти Шавкат Мирзиёев ўн тўққизинчи декабрь куни Россия Федерацияси Президенти Владимир Путин билан телефон орқали мулоқот қилди.

Икки томонлама кун тартибидаги ҳамда минтақавий ташкилотлар доирасидаги кўп томонлама ҳамкорликнинг долзарб масалалари кўриб чиқилди.

Хавфсизликка таҳдид ва хатарларга қарши курашни кучайтириш мақсадида икки мамлакат махсус хизматлари ўртасидаги яқин ва самарали ҳамкорликни давом эттириш муҳимлиги қайд этилди.

***

Ўзбекистон Президенти Шавкат Мирзиёев Германиянинг Магдебург шаҳрида юз берган фожиа оқибатида инсонлар ҳалок бўлгани ва жиддий жароҳат олгани муносабати билан ушбу мамлакат Президенти Франк-Валтер Штайнмаерга таъзия йўллади.

Маълумот учун, йигирманчи декабрь куни Магдебург шаҳридаги Рождество бозорида эллик ёшли асли саудиялик эркак БМW автомобилида одамлар орасига бостириб борган ва бунинг оқибатида камида беш киши ҳалок бўлиб, икки юздан дан ортиқ одам жароҳатланган.

***

Ўзбекистон президентининг фармони билан Улуғбек Мустафоев Жиззах вилояти ҳокими вазифасини бажарувчи этиб тайинланди. У бунга қадар «Ҳудудий электр тармоқлари» АЖ бошқаруви раиси лавозимида ишлаб келаётган эди.

Жиззах вилоятига икки минг ўн еттинчи йилдан буён раҳбарлик қилиб келган Эргаш Солиев бошқа ишга ўтиши муносабати билан лавозимдан озод этилди.

***

Бугунга етказмоқчи бўлган хабарларимиз шулардан иборат. Ўзбекистон Миллий ахборот агентлигиникузатишда давом этинг.

<iframe width="650" height="420" src="https://www.youtube.com/embed/Wm6Qw4qdC80" title="Hafta dayjesti" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>