Гвинея үкіметі елдегі 40 саяси партияның қызметін ресми түрде тоқтатты.

Reuters ақпарат агенттігі мәліметіне сәйкес, елдің Аумақтық басқару және орталықсыздандыру министрлігінің шешіміне сай партиялардың орталық және жергілікті бөлімшелері жабылады. Сондай-ақ аталған ұйымдардың атауы, қысқартылған нұсқасы мен басқа да белгілерін пайдалануға тыйым салынады.

Министрлік мәлімдеуінше, бұл партиялар қаржылық есептерді тапсыру міндеттемесін орындамаған. Алайда қызметі тоқтатылған бірқатар саяси партиялар бұл айыптауларды жоққа шығарып, барлық талаптарды орындағандарын мәлімдеген.

Гвинея табиғи ресурстарға, соның ішінде боксит пен темір кені қорына бай мемлекет саналады. Елде парламент сайлауы осы жылдың мамыр айында өткізіледі деп күтілуде.