Ғазода очлик чуқурлашаркан, 100 дан ортиқ халқаро гуманитар ташкилот Исроилга очиқ хат йўллаб, ёрдам етказишни сиёсий босим воситасига айлантиришни бас қилишга чақирди. Мурожаатга Оxfam ва “Чегарасиз шифокорлар” (MSF) каби йирик идоралар имзо чеккан.

Март ойидан кучга кирган Исроилнинг қатъийроқ рўйхатга олиш тартиби туфайли ёрдам тарқатиш, деярли, тўхтагани айтилмоқда. Қоидага кўра, Исроилда фаолият юритиш учун фаластинликлар ҳақида батафсил маълумот тақдим этиш, Исроилни “делегитимизация” қилувчи баёнотдан тийилиш лозим. Акс ҳолда фаолият бутунлай чекланиши мумкин. Оxfам вакили Бушра Холидий бу жараён “ташкилотнинг мустақиллиги ва эркин фикр билдириш имкониятини қурбон қилиш эвазига” фаолият юритишга мажбур этилаётганини таъкидлади. MSF Бош котиби Крис Локер Ғазодаги вазиятни “ўлим тузоғи” деб атади.

Ҳамас бошқарувидаги соғлиқни сақлаш вазирлиги маълумотига кўра, Исроил ҳужуми бошлангандан бери қарийб 62 000 фаластинлик ҳалок бўлган. Уларнинг 235 нафари, жумладан 106 бола очлик ва етишмовчилик оқибатида жон берган.

Мусулмон Зиё, ЎзА