Guliston shahri aholisi va shaharga kelib-ketadigan mehmonlar uchun qulayliklar yaratish, namunali transport xizmatini yo‘lga qo‘yish, eskirgan transport vositalarini ekologik toza transport vositalariga almashtirish maqsadida Guliston shahridagi “Uchlik ishonch savdosi” mas’uliyati cheklangan jamiyati Xitoy davlatining "YUTONS" kompaniyasidan 8 ta yangi va zamonaviy yo‘lovchi avtobusini xarid qildi.
— Mazkur avtobuslar davlatimiz rahbarining 2023 yil 16 fevraldagi "Jamoat transporti tizimini isloh qilish chora-tadbirlari to‘g‘risida"gi qarorining ijrosi doirasida keltirildi. Yil oxiriga qadar ushbu jamiyat tomonidan yana 12 ta, shahardagi "TRANS-IMKON-SERVIS" mas’uliyati cheklangan jamiyat tomonidan ham 12 ta avtobus keltiriladi, — deydi Sirdaryo viloyati transport boshqarmasi transport tashuvlarini muvofiqlashtirish bo‘limi boshlig‘i Rauf Ubaydullayev.
Har bir avtobusning narxi 75 ming dollardan bo‘lib, lizing shartnomasi asosida olindi. Bu esa Guliston shahrida jamoat transporti faoliyatini yanada yaxshilash, yo‘lovchilarga namunali transport xizmatini ko‘rsatish, qatnovlar oralig‘ini qisqartirish, shaharning sayyohlik jozibadorligini oshirish imkonini beradi.
[gallery-19387]
G‘. Primov, Sh. Ortiqboyev (surat), O‘zA muxbirlari