Oʻzbekiston Respublikasi Vazirlar Mahkamasi huzuridagi Oliy attestatsiya komissiyasi raisining joriy yil 30-sentyabrdagi qarori asosida Guliston davlat universitetida biologiya yoʻnalishi boʻyicha (PhD 30.09.2019-y. V91.01 raqamli) ixtisoslashgan ilmiy kengash ish boshladi.

Universitetda yangidan ish boshlagan biologiya boʻyicha ixtisoslashgan kengash mamlakatimizdagi eng yetuk 11 nafar biolog-olimlardan tashkil topgan. Ixtisoslashgan ilmiy kengashga biologiya fanlari doktori, professor Hazratqul Qarshiboyev – rais, biologiya fanlari doktori, professor Abduvoit Pozilov – rais oʻrinbosari, biologiya fanlari nomzodi dotsent Feruza Gʻoibnazarova – ilmiy kotib etib tasdiqlandi.

– Oliy taʼlim muassasamizda 3 yil davomida yana 3 ta yangi ixtisoslashgan ilmiy kengash ochishni rejalashtiryapmiz, – deydi universitet rektori, professor Muhsin Xodjiyev. – Joriy yilning oʻzida 14 nafar yosh oʻqituvchilar doktorlik dissertatsiyasi(PhD)ni aynan shu ilm dargohimizda himoya qiladi. Jamoamizning ilmiy salohiyati oʻsishi bardavomligiga ishonchim komil.