Жорий йил 25-28 август кунлари Гуанжоуда бўлиб ўтган “31st Guangzhou Fair” анжуманида Ўзбекистон миллий стенди ташкил этилди ва маҳсулотларимиз намойиш этилди.

Кўргазмага юртимизда ишлаб чиқарилиб, экспортга йўналтирилаётган 20 дан ортиқ турдаги қайта ишланган қишлоқ хўжалиги ва қандолат маҳсулоти қўйилган.  

Шунингдек, делегациямиз аъзолари Ўзбекистоннинг сайёҳлик ва экспорт салоҳияти тақдимотини ўтказиб, Гуандун импорт маҳсулотлари уюшмаси (GDIFA) бош котиби ўринбосари Вэнси Тан билан музокара ҳам олиб борди.  

Учрашув натижасида шу йил 21-23 сентябрь кунлари ўтказиладиган “Food2China Expo and the Guangzhou International Food & Ingredient Fair” кўргазмасида иштирок этадиган ўзбек компаниялари стендлари учун чегирма бериш, мамлакатимиз экспортчилари, ҳудудий ишлаб чиқарувчилари ва Гуандун ҳамда Фуцзянь музофотлари импортёрлари, савдо тармоқлари ўртасида ҳамкорлик ўрнатиш, қайта ишланган мева-сабзавот маҳсулотлари экспортини йўлга қўйиш бўйича келишувга эришилди.  

90 минг квадрат/метр майдонда ташкил этилган, 9 айвондан иборат кўргазмада шаҳарсозлик ва маҳаллий шаҳарлар тарғиботи, қишлоқ хўжалиги ва қишлоқ ҳудудларини ривожлантириш бўйича янги технологиялар намойиш этилган.  

Шунингдек, мажмуада янги озиқ-овқат ва халқаро миқёсда етказиш занжири, технология ва ускуналар, кексалар соғлиғини сақлаш саноати, тиббиёт каби йўналишлар ҳам қамраб олинган.  

ЎзА