Грузияның Шови курортындағы көшкін салдарынан қаза болғандардың расталған саны 24-ке жетті.

Грузияның аймақтық даму және инфрақұрылым министрі Ираклий Карселадзенің айтуынша, 11 тамызда тағы үш адамның мәйіті табылған.

«Тағы 9 адамды іздестіру жұмыстары жалғасуда. Іздестіруге 600-ден астам құтқарушы мен әскери қызметкер, сондай-ақ 103 бірлік ауыр техника қатысуда», - деді ол.

3 тамызда Шовиде құлаған көшкін адам шығынына әкеп соқты, коттедждер, үйлер, жолдар мен көпірлер қирады. Грузин геологтарының мәліметінше, санаулы минуттарда таудан шатқалға шамамен бес миллион текше метр жер түскен.

7 тамызда бүкіл Грузияда Шовиде қаза тапқандар үшін аза тұту жарияланды.