Грецияда ишчилар ҳукуматдан нарх-наво ошишига қарши чора кўришни талаб қилиб, 24 соатлик иш ташлаш эълон қилишди.

“Анадолу” хабарида Касаба уюшмалари ва Давлат хизматчилари конфедерациялари чақириғидан сўнг турли тизимларда шундай қарорга келинган.

Бу ташаббусни Коммунистик партия билан боғланган ПАМЕ касаба уюшмаси ҳам қўллаб-қувватлади.

Акция натижасида Афина ва яна бир неча йирик шаҳарда жамоат транспорти фаолияти тўхтади. Темир йўл ва денгиз қатнови бутунлай чекланган. Поезд рейслари бекор қилиниб, кемалар портларда туриб қолди.

Афинада иш ташлаш намойишга уланиб кетди. Пойтахт марказида йиғилган минглаб ишчи ва хизматчи ҳаёт кечириш учун зарур маҳсулотлар нархи кўтарилиши ва иш ҳақи камлигини айтиб, ўз талабларини илгари суриш учун парламент биноси олдига борди.

Пенсионерлар 2009 йил бошланган иқтисодий инқироз даврида бекор қилинган нафақаларни қайта тиклашни сўрамоқда.

Худди шундай норозилик чиқиши бошқа шаҳарлар, жумладан Салоникида ҳам кузатилди.

М.Пирматова, ЎзА