Бир йил аввал сунъий интеллект “пойга”сида ортда қолаётгандек кўринган “Google” бугун вазиятни бутунлай ўзгартирди. “Alphabet” таркибидаги компания AI соҳасидаги кескин сакраш билан “Wall Street” ишончини қайта қозонди ва “OpenAI” билан рақобатда етакчи сифатида тилга олинмоқда.

Бунга асосий сабаб – “Google”нинг “Gemini 3” модели. Янги модель фойдаланувчилар ва бизнесменлар орасида катта қизиқиш уйғотди ҳамда сунъий интеллектни компаниянинг деярли барча йўналишларига чуқур сингдиришга имкон берди. Натижада AI нафақат технологик тажриба, балки реал даромад манбаига айлана бошлади.

“Alphabet” раҳбари Сундар Пичаи компаниянинг AIга киритган инвестициялари энди бутун бизнес бўйлаб ўсиш бераётганини таъкидлади. Ҳозирда “Google”нинг “Gemini” иловаси 750 миллиондан ортиқ ойлик фаол фойдаланувчига эга. Бундан ташқари, корпоратив сегментда “Gemini”нинг пуллик лицензиялари сони 8 миллионга етган. Бу эса сунъий интеллектнинг тижорат салоҳияти анча мустаҳкам эканини кўрсатмоқда.

Шу ишонч фонида “Alphabet” жорий йилда AI инфратузилмасига ажратиладиган капитал харажатларни деярли икки баробар оширишни режалаштирмоқда. Дастлаб инвесторларни чўчитган бу режа “Google Cloud” даромадларининг 48 фоиз ўсиши билан ўзини оқлади. Натижада акциялар қисқа пасайишдан сўнг яна барқарорлашди.

Аввал “OpenAI” билан боғлиқ йирик битимлар ижобий қабул қилинган бўлса, энди инвесторлар зарар билан ишлаётган, аммо улкан мажбуриятлар олаётган моделлар борасида эҳтиёткор бўла бошлади. Ушбу жараёнларда “Google” молиявий барқарорлик ва AIдан реал фойда олаётган кам сонли гигантлардан бири сифатида ажралиб турмоқда.

Хулоса шуки, “Google” сунъий интеллектни шунчаки келажак ваъдаси эмас, балки бугунги иқтисодий кучга айлантира олди. Айнан шу жиҳат уни AI “пойга”сида “ортда қолувчи”дан етакчига айлантирди.

Мусулмон Зиё, ЎзА